Tu nentuka rayat ulih milih ketuai ti deka bebendar negika hak nengeri nengah aum MA63
“Ngagai kitai (Gabungan Parti Sarawak) ditu, udah tentu kitai ngemeratka hak enggau pangku pengawa Sarawak nyadi sebuah 'wilayah' dalam Malaysia.”
Datuk Patinggi Tan Sri Abang Johari Tun Openg
Premier Sarawak
KUCHING: Premier Sarawak Datuk Patinggi Tan Sri Abang Johari Tun Openg pechaya iya nya proses demokrasi deka meri peluang ngagai rayat Sarawak milih chalun ketuai ti dikedeka ati sida.
Tu mega, ku iya, deka ulih nentuka rayat milih ketuai ti ulih negi sereta ngetanka hak nengeri nengah aum Sempekat Malaysia 1963 (MA63).
“Ngagai kitai (Gabungan Parti Sarawak) ditu, udah tentu kitai ngemeratka hak enggau pangku pengawa Sarawak nyadi sebuah 'wilayah' dalam Malaysia.
“Kelimpah ari nya, GPS deka ngengkahka polisi, hak sereta pemerat Sarawak nengah kerejasama enggau perintah besai,” ku iya madah ngagai pegnarang berita lebuh ti ngelawa Palan Ngantung Nama Chalun P194 Petra Jaya di Dewan Al-Muneerah Sekula Sekondari (SMK) Petra Jaya ditu, Hari Enam tu tadi.
Bejaku silik bekaul pekara nya, Abang Johari ti mega chairman GPS ngarapka perintah besai ti deka ditempa tu iya nya ari perintah ti manah.
“Kitai udah mayuh masau jam enggau politik ti enda tentu taja kitai patut nya meri servis ngagai rayat.
“Tu kelebih agi lebuh ekonomi dunya dalam taun 2023 enggau 2024 dipelabaka deka betapi enggau pemar ti besai.
“Beserimbai enggau nya, endang nyadi tanggungpengawa kitai (GPS) dalam numbuhka perintah ti kuat di selampur Malaysia dikena betapi enggau gaya ekonomi ti enda tentu nengah polisi kitai ti deka mer pemaik ngagai rayat lalu mega ulih nyungkak ekonomi menua,” ku iya.
Dulu ari nya, Abang Johari udah datai di Palan Ngantung Nama Chalun ungkup Parlimen Petra Jaya di Dewan Al-Muneerah SMK Petra Jaya ditu urung pukul 9:55 pagi.
Penatai iya udah disambut Kaban Kunsil Nengeri (ADUN) Satok Datuk Ibrahim Baki, ADUN Semariang Datuk Sharifah Hasidah Sayeed Aman Ghazali sereta bala penyukung GPS ke bukai.
Berindik ari nya, meri jaku seleka dua bekaul enggau PRU15, Abang Johari ngarapka kimpin ti dipejalaika deka diatur enggau manah sereta nitihka atur ti ditetapka.
Iya mega madahka iya nya mayuh sitak GPS ti bisi belaban iya nya dipeda berebut tiga tauka empat penyuru.