MIRI: Perintah nengeri seruran bebendar mantu ngangkatmanah perengkaguna rumah sembiang ungkup pengelantang semua ti bisi mayuh jalai pengarap enggau etnik.
Sapit Menteri Nembiak, Lumba enggau Main enggau Pemansang Orang Dagang Sarawak Dr Ripin Lamat madahka tu iya nya nyengkaum nyendiaka agih belanja nengau Unit Pekara Jalai Pengarap Bukai (UNIFOR) enggau ari projek mit menua pesisir (MRP).
“Nyema bisi peminta agi rumah sembiang tu, perintah nengeri nadai penanggul deka mantu ngiga agih belanja dalam pengawa ngangkatmanah infrastruktur pemun,” ku iya dalam program ngelawa Gerija St Barnabas Taman Tunku kemari.
Iya ti mega Kaban Kunsil Nengeri (ADUN) Lambir bechuntoka Gerija St Barnabas Parish Taman Tunku ti beungkus semua nya RM3.9 juta agi begunaka agih belanja.
“Gerija tu tembu urung 97.71 peratus tang bisi ungkus sepenyampau RM1.2 juta ti bedau dibayar ngagai kunteriktor.
“Aku enggau raban gerija deka begulai dalam ngulihka agih belanja tu taun nyin ila dikena mutarka pekara ti bekaul,” ku iya.
Beserimbai enggau nya, Ripin nengah agih belanja MRP iya taun nyin ila deka ngemendarka sepenyampau RM200,000 dikena melakin jalai gerija deka digaga nyadi palan endur ngengkahka entukar.
Beserimbai enggau pengerami Krismas bulan ti deka datai, Ripin mega udah madahka MRP sepenyampau RM10,000 ngagai gerija tu ti deka diberi dalam timpuh enda lama agi.
Berindik ari tu, penyandang Parlimen P218 Sibuti, Lukanisman Awang Sauni madahka rayat begunaka perintah ti manah enggau lantang dalam neruska pelin pemansang.
“Aku ti nyadi penyandang Parlimen Sibuti ngarapka pengundi landik sereta pintar ngaga pemutus dalam milih sebuah perintah ti manah, lantang enggau ibuhka pegelantang pendiau rayat.
“Gabungan Parti Sarawak (GPS) udah bebendar negika nasit rayat enggau mayuh macham inisiatif ti dipadahka sebedau tu lalu dikearap pengundi meri mandat aku nyadi chalun dikena neruska pemansang di konstitusyen Sibuti,” ku iya.
Iya mega nambah, di Taman Tunku ngembuan mayuh rumah sembiang iya nya kuil, tepikong, gerija enggau masjid ti ngayanka pupu raban bansa di genturung pendiau tu.
“Rayat ditu patut terus ngetanka penyerakup sereta pengelantang pupu raban bansa lalu sama milih perintah ti ulih neruska pengawa pemansang enggau manah agi,” ku iya nambah.