Rayat patut nyukung GPS ngambika mayuh agi pengari dalam Parlimen nentuka nengeri tu ulih terus mansang
“Sekali tu kitai patut ngayanka ngagai parlimen maya PRU15 tu. Sarawak patut nganjung siti sada aja ti inggar enggau besai nengah penyerakup (ngundi GPS) lalu nganjung halun kitai tama ke dalam Parlimen.
Micheal Tiang
Ketuai Nembiak SUPP
SIBU: Sarawak begunaka sada ti kuat di parlimen dalam pengawa ngambi baru hak dalam Sempekat Malaysia 1963 (MA63) ti udah majak lenyau.
Ketuai Nembiak Parti Sa'Ati Rayat Sarawak (SUPP) Micheal Tiang madah, pengawa tu begunaka sukung ti tegap ari rayat Sarawak enggau ngemenangka mayuh agi chalun Gabungan Parti Sarawak (GPS) maya Pengawa Bepilih Besai Ke-15 (PRU15).
“Sekali tu kitai patut ngayanka ngagai parlimen maya PRU15 tu. Sarawak patut nganjung siti sada aja ti inggar enggau besai nengah penyerakup (ngundi GPS) lalu nganjung halun kitai tama ke dalam Parlimen.
“Kitai mesti ngundi GPS ngambika nyadi sada ti kering enggai besai dalam parlimen,” ku iya lebuh ti bejaku maya ti datai Malam Mobilisasi Umum GPS Untuk P211 Lanang enggau P212 Sibu ditu kena malam Hari Empat.
Sama bisi datai iya nya Presiden SUPP Dato Dr Sim Kui Hian, Kaban Kunsil Nengeri (ADUN) Bukit Assek Joseph Chieng, ADUN Tanjung Batu Johnny Phang, chalun GPS Parlimen Lanang Wong Ching Yong enggau chalun GPS Parlimen Sibu Clarence Ting.
Program lemai nya mega sama udah digulu kaban komponen GPS ke bukai ungkup tuju mantaika dua chalun nya di kededua kerusi diri empu.
Tiang ti mega Sapit Menteri Pengerai Mensia Mayuh, Pengawa Berumah enggau Kaunsil Kandng Menua madahka, nyadi sebuah nengeri ti pemadu manah aja di Malaysia enda umbas ungkup Sarawak, tang nya mesti ditegapka enggau sukung ari rayat ngagai perintah ti bekuasa iya nya GPS.
“Modal kitai sekali tu iya nya sukung, mesti nganjung siti sada dalam parlimen ngambika peminta hak Sarawak ulih diberi pulai baru. Tu mih maya nya,” ku iya nyemetak.
Iya madahka pengawa ngatur nengeri tu enda tau dikachau parti bukai ari Semenanjung Malaysia laban nengeri tu iya nya ungkup rayat Sarawak.
Nitih ku iya, parti luar nadai ngembuan hak dlam nyampur pengawa ngatur nengeri tu lalu ari sukung rayat ti pemadu beguna dikena nentuka GPS ngatur nengeri tu kediri.
“Ukai... Sarawak iya nya ungkup rayat Sarawak. Semina rayat Sarawak ti nemu enggau meretika nengeri diri,” ku iya ti mega ADUN Pelawan meri penerang.
Dalam pekara bukai ti bekaul, Ting madah, Lanang enggau Sibu kenyau ari baruh penyakal mayuh udah tinggal ari sukut pemansang.
Ku iya nambah, pengawa ngagihka geran pemansang mega kurang ti ngujungka mayuh pemansang infrastruktur sekeda nya enda ulih dipejalaika.
Iya mega udah meri chunto baka Jalai Tuanku Abdul Rahman nuju ngagai Padang Bilun Sibu ti enda tentu manah laban jalai nya ari baruh tanggungpengawa perintah besai.
“Nya enda ulih diintu laban ti tusah deka ngulihka agih belanja berindik ari sitak parlimen nya ari baruh penyakal,” ku iya nyemetak.
Nya alai, iya ngansak bala pengundi ditu meri sukung ngagai GPS sekali tu ungkup lima taun ti deka datai.
“Kami deka mantaika dalam nentuka Sibu manah agi ari baruh GPS,” ku iya nambah.