Kami udah ngaga sereta ngelala 960 projek ba mayuh renggat sepenyampau RM45.967 bilion ke pemansang infrastruktur Sarawak
“Sekeda ari projek nya udah tembu digaga, ke bukai nya mengkang digaga enggau renggat pra kunterik”
Datuk Amar Douglas Uggah Embas
Sapit Premier Sarawak
KOTA SAMARAHAN: Perintah Gabungan Parti Sarawak (GPS) begulai enggau perintah besai komited ngaga mayuh bengkah pemansang infrastruktur di negeri tu, pia ku Sapit Premier Sarawak Datuk Amar Douglas Uggah Embas.
Ku iya, antara projek infrastruktur besai ti benung digaga nyengkaum Jalai Besai Raya Pan Borneo, Jalai Tebing Pantai Pantai, Jalai Besai Kedua, Projek Jalai Besai Sarawak-Sabah Link Road (SSLR), Jalai Besai Trans Borneo enggau Projek Rayat.
Diatu, kami udah ngaga sereta ngelala 960 projek dalam mayuh renggat ti sepenyampau RM45.967 bilion ungkup pemansang infrastruktur Sarawak.
“Sekeda ari projek nya udah tembu digaga, ke bukai nya mengkang digaga enggau renggat pra kunterik,” ku iya lebuh bejaku maya Pengerami Konvokesyen Ke-26 Universiti Malaysia Sarawak (UNIMAS) ungkup sidang keempat ditu, kemari.
Menteri Pemansang Infrastruktur enggau Penyangkai Kapal nya madah, pengawa ngaga pemansang infrastruktur enggau beranakka puku besai nambah ti dipejalaika endang dikena ngangkatka tikas pengidup enggau ekonomi rayat.
“Nya mega lalu ulih muka peluang dagang enggau pengawa puang ngagai rebak dudi,” ku iya.
Ambika chunto ku Uggah, projek fasa keterubah Jalai Besai Pan Borneo siti ari projek infrastruktur besai di Sarawak ti beungkus RM16 bilion.
“Dijangka tenbu digaga taun baru, lalu enti projek tu udah tembu digaga,nya ulih meri penguntung ngagai rayat.Ambika banding, kitai ulih deriba enggau lanchar ari Telok Melano ke Miri sereta nadai tol, utai ti nadai kala diimpika sebedau tu,” ku iya.
Ku iya, penyambung jalai alun tu beguna amat ngagai negeri tu laban nya nyendiaka peluang baru sereta muka potensial ekonomi.
“Nyentuk ke diatu, bisi 30,650 kilometer (km) jalai negeri enggau 1,591 km jalai faderal udah direjista di Sarawak. Penyampau tu enda nyengkaum jalai ti diempu kediri baka jalai ladang enggau jalai kompeni kayu batang.
“Beratika peranak di Sarawak diau ngachir, sambung jalai ngagai pengentap pendiau di menua pesisir nyadi siti ari pekara ti deka didegika kitai di Sarawak,” ku iya.
Enggau gaya geografi di Sarawakti mar ku iya, nya begunaka belanja besai dikena ngaga jalai.
“Taja pia, pemar tu ukai nyadika kebuah kitai enda ibuhka utai ti diguna peranak di menua pesisir.
“Kebuah pia, semua orang bisi hak ensepi pengelantang ekonomi Sarawak, sosial enggau rampa menua ti manah ,” ku Uggah.