KUCHING: Pengawa mansik silik sereta bebendar patut ulih dipejalaika bekaul enggau pengawa ngaga jalai alun ba tanah kerapa di negeri tu, ti ngemeran sereta ngemeratka teknologi baru.
Premier Sarawak, Datuk Patinggi Tan Sri Abang Johari minta Sarawak Research and Development Council (SRDC) nengah Simposium Mansik enggau Ngemansang SRDC Keterubah, ulih beratika penanggul sereta chara ngaga jalai alun ti tegap ba tanah kerapa ngena teknologi baru.
"Aku bisi meda ripot ngena getah, lalu getah nya nyadi sebagi ari perengka dikena ngenegapka pelasar jalai sereta neruska pengawa ngaga jalai alun ba tanah kerapa.
"Aku minta langgur penemu tu dikemeratka (SRDC) begulai enggau Opis Kereja Raya (JKR), lalu aku dekaka bisi siti jalai ba tanah kerapa nyadi sebagi tauka alai bejalaika pansik tu ngena perengka tu (getah).
"Aku (perintah negeri) deka melanja jalai nya, ngena teknologi kita, awakka kitai bisi akses sekalika nya meri empas manah tauka enda. Enti nya meri empas manah , nya siti pemujur ba kitai ngaga jalai ba tanah kerapa,"ku iya.
Abang Johari ti nyadi Chairman SRDC mansutka langgur penemu nya maya bejadi Simposium Mansik enggau Ngemansang SRDC Keterubah ti diatur SRDC ba sebuah hotel ditu, kemari.
Ambika chunto ku iya, enti deka ke Sibu, entara padang bilun ke mengeri Sibu disema baka 'musim tengkujuh' dalam kerita, lalu kena mutarka pekara nya, jalai tanah kerapa ti lama nya deka dibelakin baru awakka nyadi baru.
"Nya alai enti kita ulih ngiga chara kena mutarka penanggul ngaga jalai alun ba tanah kerapa, udah tentu nya deka ngubah semua landskap pengawa ngaga jalai ba tanah kerapa ke ebih agi ba kandang menua tu (Sibu).
"Aku deka ngiga tauka ngelala bagi siti jalai ke patut, entara Sibu ke Mukah alai bejalaika pansik ngena teknologi baru ba pengawa ngaga jalai kitai," ku iya.
Dulu ari nya, Abang Johari madahka perintah Sarawak komited ngeluarka belanja sepenyampau RM200 juta dikena ngaga begunan SRDC.
Iya madahka begunan nya deka disikap ngena gajet ti pemadu baru, mesin sereta program analtik kena bejalaika pengawa mansik, seraya nyerungkai pekara baru ngena pengeraja asal biodiversitidi kena ngasilka produk ubat, nyengkaum vaksin enggau chara ngubat penyakit bukai ke benung ditapi diatu.
"Sehari tu kitai belajar pasal COVID-19, nya kebuah perintah Sarawak ari baruh iring aku, kami ngungkupka belanja khas kena bejalaika pengawa mansik enggau ngemansang," ku iya seraya ngarapka bisi nerima 'input' ari simposium nya.
Sama bisi ngulu pengarami tu kemari, Sapit Premier Sarawak Dato Sri Dr Sim Kui Hian, Menteri Pelajar, Inovasyen enggau Pemansang Pengelandik Datuk Roland Sagah Wee Inn, Sapit Menteri Pelajar enggau Inovasyen Datuk Dr Annuar Rapa'ee, Sapit Menteri Pemansang Pengelandik Datuk Francis Harden Hollis, Ketuai Besai SRDC Dr. Peter Morin Nissom enggau sida ke bukai.