Nyereta sektor minyak, gis ngambika ulih nyapai juluk nengeri maju enggau penatai pemisi tinggi datai ba taun 2030, ku Abang Johari
“Petroleum Sarawak Berhad (PETROS) enggau nengah Opis Menteri Dagang Antarabansa & Industri, Terminal Industri & Pemansang Orang Dagang Sarawak (MINTRED) nempa kerejasama rat enggau PETRONAS pasal startegi kena nambahka penyereta Kunteriktor Sarawak dalam Sektor Minyak enggau Gis.
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
KUCHING: Premier Sarawak Datuk Patinggi Tan Sri Abang Johari Tun Openg madah perintah negeri deka chakah agi nambahka penyereta kunteriktor Sarawak dalam Sektor Minyak enggau Gis.
Iya madahka nya dikena nyapai aspirasyen negeri ba taun 2030.
“Petroleum Sarawak Berhad (PETROS) enggau nengah Opis Menteri Dagang Antarabansa & Industri, Terminal Industri & Pemansang Orang Dagang Sarawak (MINTRED) nempa kerejasama rat enggau PETRONAS pasal startegi kena nambahka penyereta Kunteriktor Sarawak dalam Sektor Minyak enggau Gis.
‘Aspirasyen kitai ba taun 2030 iya nya nambahka Contract Threshold kitai, nambahka Priority SWEC (Standardise Work & Equipment, Categories), nambahka belanja tiap taun di Sarawak ngagai syarikat Sarawak, enggau nambahka peratus rayat Sarawak dalam kompeni Sarawak.
“Aku melabaka ari ti meda 'agenda kandungan' kitai Sarawak deka ngerembai sereta enggau nya pemansang kunteriktor Sarawak empu dalam industri minyak enggau gis,” ku iya.
Iya madahka pekara nya maya bejaku ba pengerami Ngintu Genap 5 Taun PETROS ditumbuhka, ke diatur ba BCCK ditu, malam ensanus (Hari Tiga).
Berebak enggau tu , lebuh ti ngenang lima taun PETROS udah ditumbuhka, iya madah dalam kitai deka nyapai visyen ngemansangka sumber minyak enggau gis negeri tu, Sarawak begunaka sebuah perintah ti tegap enggau kering kena neruska pengeran ke didegika diatu nyentuk 2030 enggau taun bukai ke udah nya.
Nyadi ketuai perintah Gabungan Parti Sarawak, ku Abang Johari, iya enggau kerejasama bakih dalam kabinet udah bebendar nentuka Sarawak seruran dimua ba menua enggau rantau tu.
“Sama kitai besampi ngambika syarikat minyak enggau gis ke dikeempu Sarawak tu deka mai Sarawak nuju ngagai era ekonomi ti nyulut lebuh manggai taun 2030 ila,” ku iya.
Sama bisi datai ba pengerami tu, Sapit Premier Sarawak, Datuk Amar Douglas Uggah Embas enggau Dato Sri Dr. Sim Kui Hian, Chairman PETROS Tan Sri Datuk Amar Hamid Bugo, enggau bala menteri, sapit menteri sereta pemesai ke bukai.