KUCHING: Pemansang modal mensia dalam raban nembiak di negeri tu patut ditegap enggau dikemerat awakka setipak enggau ubah teknologi enggau ekonomi diatu.
Sapit Menteri Nembiak, Lumba enggau Main, enggau Pemansang Orang Dagang Sarawak, Dato Gerald Rentap Jabu madahka, ubah jeman diatu ngayanka peminta guna pemansang modal mensia tu ti majak nambah.
Nitihku iya, chara nya kena ngemansangka modal mensia dalam raban nembiak patut kena nyapai juluk perintah negeri ti deka nyadika Sarawak maju 2030.
"Mayuh pekara dikerandau enggau usul udah dibanataika gerempung, kelab sereta gerempung nembiak di Sarawak ti deka dikenataika maya aum besai kebangsaan ila.
"Entara ti dikerandau bisi lima usul iya nya bekaul enggau dadah, lumba haram, peluang gawa, insentif diberi ngagai gerempung enggau kelab sereta kursus pengurusan enggau seminar ba raban nembiak," ku iya.
Iya mansutka pekara tu ba aum pengarang berita pengudah Majlis Perundingan Belia Negara (MPBN) Sidang Kedua, Penggal Ke-33 ungkup Sesi 2021-2022 Renggat Negeri Sarawak, ba Hotel Imperial, kemari.
Gerald nerangka, tebal agi raban nembiak diatu enggai nampung pelajar ke renggat universiti.
"Sida (nembiak) lebih senang sereta deka agi gawa dalam ekonomi gig baka nyadi pengajung pemakai 'Foodpanda' enggau 'Grabfood'.
"Tebal agi sida mega bisi runding lebuh nyambung pelajar, sida deka betapi enggau utang Perbadanan Tabung Pendidikan Tinggi Nasional (PTPTN).
"Tang di Sarawak, PTPTN tu ulih dibayar nengah Yayasan Sarawak ungkup anak Sarawak. Iya kebendar iya ukai isu enggai tu iya nya siti pekara ti patut dipejalaika sechara proaktif enggau enti enda, modal mensia kitai nadai.
"Nyema modal mensia nadai, baka ni deka nuju ngagai ekonomi baru baka ekonomi hidrogen, petrokimia enggau ke bukai," ku iya.
Berebak enggau tu, kena ngenegapka pengara ngurus kelab nembiak di Sarawak, opis menteri iya meri penemu ngambika mayuh agi program enggau seminar diatur nengah digital innovation hub ti dipejalaika Perbadanan Ekonomi Digital Sarawak (SEDC).
"Kelimpah ari nya, tanggung pengawa gerempung ukai dikuasa perintah (NGO) ba pengawa nguruska nembiak beguka kena nyaga komuniti seraya ulih ngerapitka penyerakup di Sarawak," terang iya.
Bekaul enggau peminta ngagai litar motosikar di kandang menua Kuching, Gerald madah nya enda bisi dalam perambu.
"Naka ke diatu, bisi siti litar di Miri enggau pengawa ngaga litar di Kuching agi ba renggat diperambu. Engka deka digaga ba Petra Jaya," ku iya.
Sama bisi datai Direktor Opis Belia enggau Lumba enggau Main Negeri Sarawak, Lamat Nyalau enggau Sapit iya, Ronnie Boniface Nugi.