KK di negeri tu ke deka dikemanahka agi nya bepelasarka pekara ti dikerandau begulai dalam aum Komiti (MA63)
"Apin lama YB Menteri Pengerai Malaysia bisi datai ke Sarawak sereta YB Khairy Jamaluddin deka nambahka pemanah perengka guna pengerai (di negeri tu).
Datuk Patinggi Tan Sri Abang Johari Tun Openg
Premier Sarawak
Dikarang Rengenyan Labang
KUCHING: Lebih 200 klinik pengerai (KK) di serata Sarawak ti bisi infrastruktur tauka perengka guna nya patut dikemanahka agi.
Premier Sarawak, Datuk Patinggi Tan Sri Abang Johari Tun Openg madah pekara nya dipadah Menteri Pengerai Malaysia Khairy Jamaluddin maya bisi datai ke Sarawak,ti nyebut deka nambahka agi perengka guna pengerai ba KK di negeri tu.
Abang Johari madahka KK di negeri tu ke deka dikemanahka agi nya bepelasarka pekara ti dikerandau begulai dalam aum Komiti Sempekat Malaysia 1963 (MA63).
"Apin lama YB Menteri Pengerai Malaysia bisi datai ke Sarawak sereta YB Khairy Jamaluddin deka nambahka pemanah perengka guna pengerai (di negeri tu).
"Enggau, udah dikarandauka dalam (komiti) MA63, iya nya kami udah berandau begugai deka ngemanahka agi klinik ti sepenyampai 227 klinik di serata Sarawak patut dikemanahka agi perengka guna iya.
"Kitai beterima kasih ngagai YB Khairy Jamaluddin ti beratka perengka guna pengerai kitai, tu nyengkaum ba bagi menua Sri Aman," ku iya.
Abang Johari ngenang pekara tu lebuh iya bejaku seraya bejadi Pesta Benak Sri Aman 2022 di Sri Aman, kemari.
Berebak enggau tu iya mega madahka sepital baru Sri Aman ke udah tembu mega deka disediala lutur pakar.
Dulu ari nya iya ngingatka rayat terus ngemeratka pengerai diri laban COVID-19 bedau punas, lebih agi diatu deka ngena sengkabung idung enggau mulut nitihka peneka diri.
Dalam pekara tu Abang Johari beterima kasih ngagai Chairman JPBNS Datuk Amar Douglas Uggah Embas enggau komiti iya sereta pemesai perintah ke udah bebendar ngelempung pemerat ke ditapi rayat lebuh betapi enggau COVID-19.
"Sehari tu pilih kita empu enda ngena sengkabung idung enggau mulut. Pagi tu mayauh ke enda sengkabung idung enggau mulut tang aku ngelalau ngambika bejaga enti ulih kena tau kena , enti enggai ngena enda ngawa.
"Perintah negeri udah ngungkupka BKSS semua sembilan enti dichampur RM6.8 bilion ti dikeluarka ungkup rayat, tu chara kitai ngambika rayat ulih gawa baka normal lebuh kitai meri bantu.
"Sarawak iya nya negeri ti tebilang di Malaysia ti meri bantu ngagai rayat iya kelimpah ari perintah besai," ku iya.