KUCHING: Projek ngaga Jalai Akses ke Tunoh, Kapit enti udah tembu digaga jemah ila deka meri pengelantang enggau ngerancakka agi aktiviti sosio-ekonomi peranak ba urung 10 buah rumah panjai ba kandang menua Tunoh, Baleh di Kapit.
Menteri Dagang Dalam Negeri enggau Pekara Penguna, Dato Sri Alexander Nanta Linggi ti madah, ke diatu peranak ti diau jauh di menua ulu nya agi bepanggai ba perengka pengangkut sungai sereta begunaka ungkus belanja ti besai.
Iya ke nyadi Chairman Ejensi Pemansang Hulu Rajang (URDA) madah, langgur projek ngaga Jalai Akses ke Tunoh, Kapit nya udah dikemendar tang arung jalai nya diubah ari ke udah dilanggur dulu ari tu.
"Sehari tu kitai ngaga penetap (arung) ti bepelasarka penemu ti dipasutka pengari rayat, peranak menua sereta ketuai raban bansa menua nya, enggau penemu ari bala opis pelilih menua enggau opis residen di Kapit laban sida mega nemua gaya utai ke amat nyadi din.
"Projek jalai tu kena bisi sepemanjai 37.9 kilometer sereta nitihka JKR Standard iya nya R1 Satandard.
"Kitai dipadah bisi 10 buah rumah panjai deka dipansa sereta bulih penguntung ari projek tu ila. Tu amat besai reti laban kandang endur tu di menua ulu, enti nadai projek tu dipejalaika, peranak di menua tu din tusah deka mindah laban sida agi tusah bepanggai ngena perau sereta begunaka belanja besai," ku iya seraya madahka projek pemansang tu patut ulih dipejalaika enggau lengkas.
Kaban Parlimen Kapit tu madahka pekara tu ba aum pengarang berita, pengudah ngulu pengawa nutup program 'Stakeholder Engagement Workshop Score - Access Road to Tunoh, Kapit' ti diatur Opis Pemansang Koridor Kandang Menua (RECODA) ba Auditorium LCDA, Menara LCDA, The Isthmus ditu, kemari.
"Enti projek tu tembu ila pejalai sida muntang mindah lalu engka ungkus belanja sida lebih murah ari ke diatu," ku iya.
Langgur projek ngaga Jalai Akses ke Tunoh, Kapit ari ba renggat tumu, bepanggai ba ungkus belanja enggau timpuh projek, dipejalaika bedau ditetapka.
Dulu ari nya, lebuh ke bejaku ba pengawa nutup program tu, Nanta meri terima kasih ngagai Premier Sarawak Datuk Patinggi Tan Sri Abang Johari Tun Openg ke udah ngungkupka RM1.5 bilion ngagai URDA ba fasa keterubah dikena bejalaika projek ari baruh ejensi pemansang tu.
Taja pia ku iya, bisi mega projek dalam URDA ke udah dilanggur bedau dipejalaika, lalu nyema laluh ungkup belanja ke bedau dikena nya ulih dikena bejalaika projek ke ke bisi empas besai baka program sosio-ekonomi ke udah dikerandau dalam bulan April taun tu tadi.
Iya madahka ungkup belanja ke diberi perintah negeri nya siti ari pengeran proaktif ti deka ngemansangka kandang endur Ulu Rajang enggau lengkas.
"Nambah nya, ari baruh Langgur Pemansang Malaysia Lumpar Ke-12, perintah besai mega nyendiaka ungkup belanja ngagai RECODA dikena merambu enggau ngaga tiga projek ti bisi empas besai ba kandang menua Kapit.
"Tiga projek tu iya nya ngaga Jalai Akses ke Samarakan / Sangan /Nanga Merit / Kapit (Fasa 2), Jalai Akses ke Taba Tekat Ai Baleh; enggau Jalai Akses ke Tunoh, Kapit," ku iya.
Kelimpah ari nya, iya madah diri gaga ati laban RECODA udah nembuka Pelin Besai ungkup Bakun, Kapit enggau Belaga,lalu Pelin Besai tu udah tentu deka mantu ejensi perintah ti bekaul ngelanggur enggau ngaga projek ti lebih sistematik, kelebih agi dalam pengeran deka ngemansangka kandang garis entara menua, ku iya.
"Semua tu ngayanka perintah seruran nimpai ke mua sereta sedia ngena langgur timpuh panjai dikena ngemansangka kandang endur URDA ti ulih ngangkatka tikas idup rayat jemah ila," ku iya.
Sama bisi ngulu aum pengarang berita tu kemari, Ketuai Pemesai Eksekutif RECODA Datu Ismawi Ismuni, Kaban Parlimen Hulu Rajang Datuk Wilson Ugak Kumbong, Kaban Kunsil Negeri Pelagus Wilson Nyabong Ijang, ADUN Bukit Goram Jefferson Jamit Unyat enggau ADUN Baleh Nicholas Kudi Jantai sereta ke bukai.