KUCHING: Gerempung Pengintu Pengelantang Pendiau Raban Bansa Asal Engkilili, Lubok Antu enggau Skrang (PELASAR) ditumbuhka kena nyaga pengelantang pendiau kaban iya kelimpah ari ngemeratka pekara pelajar.
Kaban Parlimen Lubok Antu ke mega penyanding penemu PELASAR, Jugah Muyang madahka gerempung tu komited nyaga kaban iya, ke diatu bisi urung 145 iku.
Ku iya, PELASAR nyadi platform kena kaban iya ke diau di Kuching betemu, awakka ulih merambu sereta ngatur mayuh aktiviti ti nguntungka semua.
“PELASAR ditumbuhka kena kitai awakka ulih bekunsika peneleba sereta mantu bala kaban gerempung tu ke betapi enggau penusah tauka penanggul.
“Kami mega beratka pelajar anak kaban gerempung tu,” ku iya.
Jugah mansutka pekara tu nyerumba serumpu makai lemai sereta pengawa bejadi PELASAR ba PCC ditu, apin lama.
Nambah nya, iya madahka gerempung tu engka mega deka muka tauka nerima orang ke diau di luar Kuching nyadi kaban PELASAR ba timpuh ke deka datai.
“Naka ke diatu, PELASAR semina dibuka ngagai orang ke diau mendam di Kuching nyengkaum Bau, Samarahan enggau Serian,” ku iya.
Sama bisi datai ba pengerami tu, Presiden PELASAR Gemong Baru enggau lebih 700 iku kaban enggau orang ke dikangau ngulu pengerami tu.