KUCHING: Sistem mayar ngena mata duit ba semua sepital enggau klinik ti ari baruh kuasa Opis Menteri Pengerai Malaysia (KKM) di Sarawak agi dikena.
Sapit Premier Sarawak Dato Sri Dr Sim Kui Hian madah, nya jamin di beri Menteri Pengerai Khairy Jamaluddin pengudah berundingka perintah Sarawak diatu benung dalam proses ngangkatka bungkur internet di serata negeri kelebih di menua pesisir.
"YB KJ (Khairy Jamaluddin meri jamin, agi berundingka pasal bungkur Internet di menua pesisir Sarawak ti benung dikemanah nyengkaum sekeda raban orang lunggar umur ke enda nemu ngena gajet digital, nya alai bayar ngena mata duit agi diterima ba klinik enggau sepital JKNS (Jopis Pengerai Negeri Sarawak).
"Terima kasih laban meretika pekara nya lalu kerejasama ngujungka servis ba pengerai terus ulih diakses sereta dikena di Sarawak," ku iya madah nengah Facebook iya kemari.
Dr Sim yang ke mega Menteri Pengerai Mensia Mayuh, Pengawa Berumahan enggau Kaun sil Kandang Menua nyemetak madahka Sarawak deka nyukung inisiatif mayar enda ngena mata duit ba klinik enggau sepital ke ari baruh kuasa KMM.
Ku iya, nya setipak enggau pengawa perintah negeri ke ari baruh iring Premier Sarawak Datuk Patinggi Tan Sri Abang Johari Tun Openg 'leap frog' Sarawak nengah ekonomi digital.
Semua fasiliti Opis Menteri (KKM) dijangka deka nerima bayar enda ngena mata duit berengkah ari bulan Oktober ke deka datai tu ila.
Bayar nya tau dibayar nengah mod 'e-pembayaran' baka kad debit, kad kredit enggau e-dompet berengkah ari 1 Oktober 2022,lalu bayar ngena mata duit semina dikemendarka enti penguna nadai akses nya.
Dalam siti surat tesau Ketuai Sekretari KKM ensana, madahka bayar enda ngena mata duit nyadi pilih chara transaksyen nya ti ditetapka nengah Langkar Kereja (Blueprint) Ekonomi Digital Malaysia Taun 2021 ungkup renggat Perintah Besai enggau negeri.
Nya mega dipejalai kena nyeliahka ari nyadi pengelimpang ba asil perintah, setipak enggau 'Pelin Antirasuah KKM 2021-2022'.
"Semua fasiliti KKM semina deka nerima bayar enda ngena mata duit nengah mod 'e-pembayaran' baka kad debit, kad kredit enggau e-dompet berengkah ari 1 Oktober 2022.
"Bayar ngena mata duit semina dikemendarka enti penguna nya nadai sebarang mod e-pembayaran tauka akaun bank," pia ku penerang nya.
Surat tesau nya madah semua Opis Pengerai Negeri (JKN) deka begunaka timpuh kena nentuka inisiatif nya lanchar dikena, baka nentuka abis nadai 95 peratus transaksyen nerima bayar enda ngena mata duit ba tetiap fasiliti sida sereta ngelala PTJ kena bejalaika nerima bayarukai mata duit ngena Terminal Point of Sale (TPOS) enggau DuitNow.