SIBU: Ketuai Komuniti enggau Ketuai Bansa (KMKK) dipinta betemu enggau pemesai pelilih menua dulu lalu ukai nya terus nyain ngapa sebarang dokumen ti dianjung ngagai sida.
Sapit Menteri ba Jabatan Perdana (Integriti enggau Ombudsman) Datuk Dr. Juanda Jaya kemari, madahka sida enda patut nyukung nama aja pan tang enda nemu silik pekara nya.
"Nyema pekara nya enda betul, anang nyain sebedau nyidi enggau silik. Anang semina ngemendarka sekeda pekara ti enda ditemu kitai, tau anjung ngagai D.O (Pemesai Pelilih Menua) dulu.
"Tu bekaul enggau integriti lalu kita patut mantaika nya ngagai Opis Pelilih Menua. Kitai enggaika KMKK tu ngaga salah ti ulih ngujungka bisi penanggul di renggat atas lalu mai nama jai ngagai ejensi perintah," ku iya ba Pengerami Bejadi 'Jelajah Integriti' Bagi Menua Sibu Siri 7/2022.
Ku iya, penanggul bansa tu ti suah nyadi nyengkaum bekaul enggau projek perintah nengeri ti udah bisi dipejalaika di genturung pendiau tauka umah panjai.
Ku Juanda nyemetak, KMKK patut meresa enggau silik projek ti deka dipejajaika ngambika nadai nyadi penanggul jemah ila.
"Nya alai, endang beguna ngagai siku KMKK nemu sebarang projek tauka penanggul genturung pendiau tauka rumah panjai sida.
Kebuah pia laban KMKK iya nya mata enggau pending Opis Pelilih Menua. Nyema bisi nyadi penanggul ba renggat baruh, nya ti ngujungka penanggul ba renggat atas lalu ulih ngenyaika nama manah ejensi," ku iya nyemetak.
Iya ti mega Kaban Kunsil Nengeri (ADUN) Jemoreng nya mega ngelalau ngambika KMKK enda enggau sepeneka ati madahka nembiak redak dipegai sida ngaga peminta bantu ari perintah.
Nitih ku Juanda, KMKK patut nasat asal sida sekalika tau tauka enda nerima bantu nya.
"Peresa dulu asal sida. Sidi sekalika sida tau tauka enda, sekalika bantu ti dipinta nya patut tauka enda. Laban tu udah nyadi di renggat genturung pendiau ke alai bisi endang patut enda bulih nerima tang ti enda nitihka penetap patut bulih tau bulih lalu nyamai bulih bantu ninting bulan," ku iya.
Nitih ku iya, perintah enggaika sebarang aset tauka duit perintah dipejeraka pia aja ketegal integriti KMKK.
Lebih 442 KMKK Bagi Menua Sibu nyereta program ti diatur Unit Integriti enggau Ombudsman Sarawak (UNIONS), Jabatan Perdana Sarawak enggau kerejasama Opis Pelilih Menua Sibu sereta Opis Residen Sibu.
Sama bisi datai Direktor Unit Integriti enggau Ombudsman Sarawak (UNIONS) Adana Jed, Residen Bagi Menua Sibu Wong Hee Sieng, Pemangku Pemesai Pelilih Menua Sibu Salehah Sid enggau Temenggung Dato Vincent Lau Lee Ming.