KUCHING: Urung 200 iku ti bisi ati deka nyadi pengajar, berasai asa ati laban peminta sida deka nyadi pengajar di negeri tu maya pengawa ngambi nyadi pengajar dalam bulan November nyin tadi enda mujur ketegal mimit kuota ungkup rayat Sarawak.
Henry Sait Voniface Sudok, 28, ari Betong ti bisi enggau interviu nyadi pemesai pelajar gred DG41 (Pegawai Perkhidmatan Pendidikan DG41) asa ati enggau pemutus ti dikeluarka kena 28 Mei nyin tadi.
"Chalun peranak Sarawak asa ati pengudah ke nganti pengelama enam bulan, kami dipadahka peminta kami enda mujur ketegal mimit kuota," ku iya.
Iya madahka seraban ari sida udah nganjung surat rasmi kena ngapil minta kuota khas ungkup rayat Sarawak ngagai Direktor Pelajar Sarawak (JPNS) enggau Menteri Pelajar Sarawak, Sapit Menteri Pelajar I enggau II, laban di Sarawak agi suntuk pengajar baka ti dibantaika dalam media sosial Suruhanjaya Perkhidmatan Pendidikan (SPP) kena 27 Mei 2022.
"Surat nya bisi nama 202 chalun ti mujur dichiri enggau lengkas berengkah ari13 Jun 2022, pengudah nengah semua prosedur ngambi nyadi pengajar nyengkaum vaksinasyen penuh enggau dos 'booster' COVID-19.
"Tebal agi ari bala kami ngembuan peneleba ngajar ba institusyen perintah,peribit enggau NGO (Gerempung Ukai Dik uasa Perintah). Kebendar iya kami udah sedia deka ngajar pengudah ke diinterviu dalam bulan November 2021," ku iya madah nengah penerang berita ditu, ensana.
Ku iya, kena nimbal surat nya, Sapit Menteri Pelajar Sarawak, JPNS enggau SPP Sarawak udah baum berandauka isu suntuk pengajar di Sarawak kena 26 Mei 2022.
"Sapit Menteri Pelajar, Inovasyen enggau Pemansang Pengelandik I Dr Annuar Rapaee enggau Sapit Menteri Pelajar, Inovasyen enggau Pemansang Pengelandik II Datuk Francis Harden Hollis madahka sida deka berandauka pekara nya enggau Menteri Pelajar, Inovasyen enggau Pemansang Pengelandik dalam sesi meri penerang pandak be gulai enggau pengari raban nya," ku iya.
Tambah iya, sekeda pengari rayat ke bukai mega madahka diri meri sukung ngagai raban ti bisi potensi sereta keran naydi pengajar di Sarawak.
Ba penemu Henry,ngambil pengajar ari menua tu empu deka ngurangka isu bukai bekaul enggau pengajar ari Semenanjung ti diasuh ngajar ditu nyengkaum enggai datai ngeripot diri bekereja di Sarawak, enggai ngajar ba kandang menua pesisir kelebih agi ba kandang menua ulu entigis sereta semina bekereja dalam timpuh ke enda lama sementara nganti dipjndah pulai kin baru.
"Kami ngarapka Perintah Sarawak enggau JPNS berundingka rayat Sarawak ti udah nengah semua prosedur ngambil pengajar Kontrak Perkhidmatan 2021, diambi enggau lengkas kena ngisi penanggul suntuk pengajar di negeri tu nitihka polisi dasar 90:10," ku iya.