KUCHING: Pengudah dua taun nadai ngintu pengerami Hari Gawai Dayak begulai enggau kaban belayan laban pandemik COVID-19, taun tu komiti pengatur program Gawai Dayak 2022 ari Rumah Maureen, Kara Atas ti betuaika Tuai Gawai Franklin Jack udah ngelangkar mayuh macham aktiviti dikena ngerichahka agi pengerami Hari Gawai 2022.
Pengerichah ngintu Gawai taun tu berengkah diasai sekayu rumah panjai TR Maureen kenyau ari 31 Mei.
Program Mantar Gawai tu udah ngayanka semua peranak Rh Maureen ngatur pengawa beripai dalam nyendiaka pemakai sereta ngiyas ruai dikena ngintu pengerami Hari Gawai.
Ari pengawa betuchika perengka gerempung nyentukka nganchau tikai di ruai, semua nya dipejalaika enggau besaup sama diri.
Kena lemai 31 Mei, berengkah ari pukul 7 lemai program keterubah diatur iya nya makai serumpu bebala mayuh, sekali tu atur digaga tetiap ruang bilik bela ngibun makai di ruai diri seraya ti begari enggau manah dikena nentuka bagi ruang bilik ti menang dalam pekit 'Diri Sebilik Ti Pemadu Mayuh'.
Dalam pekit tu, bilik TR Maureen udah menggi gelar champion laban ti ngembuan urung 20 iku diri sebiik ti bisi pulai ngintu Gawai di rumah panjai taun tu.
“Pengudah nya, program dirichahka agi enggau pekit ungkup raban nembiak mit. Tu dikena meransang sida ngambika nentuka pemanah kaul enggau sama diri kelebih agi ti udah lama enda pulai ke menua ketegal Atur Nagang Pemindah (PKP) COVID-19.
“Bisi mega diatur penerami ngintu Hari Indai seraya ti udah begulai bebala mayuh kelebih agi bisi bala kaban belayan ti lama enda pulai laban PKP,” ku Franklin madah ngagai Utusan Borneo kemari.
Nangkanka nya bisi mega diatur Pekit Karaoke Gawai 2022 lalu, Franklin ti mai lagu 'Bunyi Gitar' sada nyawa asal P.Ramlee udah nentuka iya nyadi champion dalam pekit tu.
Pekit kepenudi iya nya Keling enggau Kumang Gawai Kara Atas 2022 ti udah dipilih nengah pemanah baju ke dikena maya ngintu Mantar Gawai sereta ari sukung bala nembiak redak ke bukai.
“Pengerami Gawai taun tu ngayanka kitai serumah chukup manah kaul enggau diri sama diri, ari pemujur kitai udah nentuka Malam Mantar Gawai 2022 udah dipejalaika enggau rami,” pia ku Penghulu Menjang ti bejaku seraya bejadika Program Pengerami Hari Gawai 2022 maya tengah malam 1 Jun.
Kena pagi 1 Jun, program diteruska enggau pengawa betikika bala lelaki, bejalai beala mayuh ngelingi ruai, nyuaka perais pekit ti diatur maya Malam Mantar Gawai sereta ngabang ngagai tetiap pintu bilik.
“Aku beterima kasih enggau suung sereta kerejasama semua ti udah bebendar nentuka Gawai taun tu rami baka ke diintu sebedau kitai betutup bilik maya pandemik COVID-19,” ku Maureen.