KUCHING: Pengawa ngatur lumba enggau main sereta aktiviti ti regas kelebih agi dikena ngangkatka semekih entara tim patut diatur suah agi laban nya ulih mantu ngangkatka indeks pengelantang enggau pengerindu dalam komuniti.
Menteri Pemansang Orang Indu, Nembiak Mit enggau Pengelantang Komuniti Dato Sri Fatimah Abdullah madah, pengawa ngatur lumba enggau main tauka aktiviti tu ukai semina ulih ngerapitka kaul tang mega ulih ngadaka ulah ti ulih besaup sereta nyukung enggau mega meretika sama diri.
“Kami di opis menteri, endang deka ngempungka komuniti lalu pengudah nya ulih nentuka ulah ti bebasaka sama diri. Tu chukup manah laban nya ulih nentuka pengelantang dalam komuniti.
“Kitai dekaka Sarawak ngembuan indeks pengelantang enggau pengerindu komuniti ti tinggi,” ku iya madah ngagai pengarang berita lebuh ti ditemu pengudah ngelepaska pesereta 'Solidarity Jet Ski Tour' ba Tebing Sungai Kuching, kemari.
Ku Fatimah madah, entara batang tuju program tu diatur begulai enggau Kelab Jet Ski Dalat, Kelab Lumba enggau Main Rekreasyen Pulau Li Hua iya nya dikena ngerapitka kaul enggau solidariti entara pesereta.
“Sida digempungka laban rinduka main ti sama, iya nya lumba jet ski, bisi sekeda ari komuniti enda nemu laba sida tu ngaga pengawa ti ngembuan risiko ti besai laban ti betapi enggau mayuh macham penguji sepemanjai pejalai.
“Betapi enggau gaya mua hari ti enda manah kena 2 Jun nyin tadi, di tengah tasik ti besai, udah tentu kerejasama enggau solidariti ti rat nentuka sida ulih mutarka semua penanggul tu enggau manah,” ku iya.
Fatimah ti mega Penyanding Penemu Kelab Jet Ski Dalat madah, konvoi tim tu iya nya berengkah dipejalaika kena 1 Jun nyin tadi ari Dalat nengah Batang Oya, lalu nengah Sungai Kut, pansut ngagai Batang Igan lalu pengudah nya nengah Batang Rajang sebedau nengah Tasik China Selatan dikena ngenatai kediri di Kuching.
Beserimbai enggau nya, Ketuai Polis Pelilih Menua (KPD) Dalat DSP Saga Chunggat ti nyadi ketuai tim tu madah, bisi 19 jet ski ari Kelab Jet Ski Dalat, Kelab Jet Ski Kuching enggau Kelab Lumba enggua Main Rekreasyen Pulau Li Hua, Sibu udah ngambi bagi dalam program tu.
“Endang ditemu aktiviti tu chukup begunaka pengering mental enggau fizikal lalu begunaka langkar program ti silik laban nya ngembuan risiko diri empu maya nengah Tasik China Selatan.
“Chkup gaga ati kami enda betapi enggau penanggul laban ti bisi langkar program sereta udah nyikap diri tumu, kitai mega disikap enggau kereban ti manah baka dikena nentuka kuing GPS, telefon satelit enggau pekara bukai ti dokemeratka.
“Kitai mega udah madahka ngagai raban ti bekuasa baka Ejensi Penerit Adat Maritim Malaysia (APMM), Polis Diraja Malaysia (PDRM) enggau Kaunsil Sungai Sarawak (LSS) dikena nentuka pejalai tim tu lanchar lalu nyema bisi sebarang penusah ngenyit, kami mega udah besedia,” ku iya.
Sama datai iya nya Presiden Kelab Jet Ski Dalat Ting Wee Kuok, Penghuluy (Dalat) Ling Chee Kiew, Samuel Chia ari Kelab Jet Ski Kuching enggau Daniel Luis ari Kelab Lumba enggau Main Rekreasyen Pulau Li Hua,Sibu.