KUCHING: Pengawa ngatur pekit lumba enggau main di sekula iya nya pelasar ti ulih meri ngagai pekara ti positif bekaul enggau ulah orang siku-siku kelebih agi ngagai bala nembiak sekula.
Sapit Direktor Opis Pelajar Pelilih Menua (PPD) Padawan Bolkiah Ali madah, pekara ti diulih ari program tu iya nya nyengkaum runding ti ulih bebatak asur, beserakup, ngangkatka pemanah ulah sereta fizikal ti bekualiti agi.
Nitih ku iya, tu reti nya pengawa ngatur lumba enggau main di sekula ulih meri pemaik ti besai enggau dalam ke ukai semina ungkup bala nembiak aja, tang ngagai institusyen pelajar.
“Nengah lumba enggau main, kitai mega ulih nerenakka runding ti ulih besemekih enggau manah dalam akademik kelimpah dalam aktiviti lumba enggau main.
“Nyema pengeransing dalam lumba enggau main tu terus dikemeran, aku pechaya institusyen pelajar ulih besemekih dalam mayuh macham bidang di renggat Padawan sereta mega nengeri,” ku iya lebuh ti bejaku ba Pengerami 'Penangguhan Kejohanan Sukan dan Olahraga' Kaunsil Lumba enggau Main Sekula Pelilih Emnua (MSSD) Padawan 2022 di Stadium Sarawak, bedau lama ti udah.
Bejaku bekaul enggau lumba enggau main nya, entara kategori ti bisi iya nya belanda 60 meter (m), 100m, 200m, 80m merejuk pagar, 'lompat tinggi', 'lompat jauh' sereta 'lontar peluru'.
Lumba tu dibagika ngagai enam kategori iya nya kategori lelaki 10 taun ke baruh, orang indu 10 taun ke baruh, lelaki 11 taun ke baruh, orang indu 11 taun ke baruh, lelaki 12 taun ke baruh enggau orang indu 12 taun ke baruh.
Aktiviti ti diatur pengelama dua hari berunggu tu iya nya berengkah 24 nyentuk 25 Mei nyin tadi udah ngayanka Sekula Primari (SK) Matang Jaya mujur nyadi champion.
Lalu pia mega, SK Sam Hap Hin ba penuduk lumur dua, sereta SJK Chung Hua Batu 10 menggi penuduk lumur tiga.
Pia mega, bisi tujuh iku nembiak ari bemacham kategori ti enggau lumba enggau main nya udah diberi gelar atlit lelaki pemadu nyulut (olahragawan) enggau atlit orang indu pemadu nyulut (olahragawati).
Entaranya, Amir Raziq Bahtiar ungkup kategori lelaki 10 taun ke baruh, Jomesson Joel (lelaki, 11 taun ke baruh), Shah Amirulhisyam Saiful Rizal (lelaki, 12 taun ke baruh).
Lalu ungkup kategori olahragawati 10 taun ke baruh dipenggi Marissa Dahlia Steven enggau Vylycia Tracey Lim, Marbella Audrawela Rita (11 taun ke baruh) sereta Felicia Gero (12 taun ke baruh).