KUCHING: Perintah negeri engka berunding deka meri diskaun ba rega penguna gis petroleum cecair (LPG) nengah chara berandau enggau pengeluar silinder ambi ngurangka rega ungkus silinder.
Premier Sarawak, Datuk Patinggi Tan Sri Abang Johari Tun Openg madah, perintah besai udah meri subsidi ba rega LPG penguna nyentuk 50 peratus.
"Rega ke dijaga ungkup silinder bisi isi LPG 14kg (kilogram) iya nya RM26.60 (iaitu RM1.90 per kg enti dibandingka enggau rega ba pasar ti dianggarka RM4.20 per kg tauka RM59.80 ungkup 14kg).
"Aku enggau kaban kabinet engka deka berunding meri diskaun ba rega penguna LPG nengah chara berandau enggau pengeluar silinder ambi ngurangka ungkus silinder,î ku iya lebuh ke bejaku nutup jurai maya aum DUN ditu, kemari.
Abang Johari nyemetak madahka Gabungan Parti Sarawak (GPS) deka majak nyaga pemaik penguna gis nengah Opis Menteri Utiliti enggau Telekomunikasyen kena nentuka pengelikun bekal enggau rega sebaka di serata Sarawak.
Ku iya, perintah negeri tudah mujur nyain Sempekat Mutarka Komersial (CSA) enggau Petronas kena 7 Disember 2020, ti meri PETROS bejalaika pengawa nyaga sereta matau minyak, ngelumbung enggau ngiga ba semua endur di darat tanah Sarawak.
"Kitai udah bisi peantai pemisi ke lebih besai ari minyak enggau gis ti diasilka di Sarawak nengah Chukai Dagang Negeri (SST). Baka ti dipadahka Menteri Kedua Wang enggau Ekonomi Baru lebuh ke nyimpul jurai iya, SST ti digumpul ari minyak mata enggau gis lela asal berengkah ari 1 Januari 2019 udah nyadi penyaup besai ngagai penatai pemisi kitai, ke sepenyampau RM8.52 bilion naka ke diatu ari RM11.01 bilion ari semua SST yti digumpul naka ke diatu," ku iya.
Kelimpah ari nya, Abang Johari madahka perintah negeri nemu pasal rega barang pemakai ti majak niki ti lalu ngeruga ungkus pengidup.
Ku iya, perintah Sarawak deka masuk champur ngena kuasa iya nyengkaum chara kena ngurangka empas kos pengidup ti majak niki kelebih agi ba rega pemakai ngagai rayat.
"Ketegal nya, aku deka meri diskaun ba rega elekterik ngagai pengeluar enggau perunchit barang pemakai nyenkaum pak kopi, restoran, industri pemakai enggau ai irup kena ngurangka ungkus sida bejalaika dagang.
"Nya alai, aku dipelaka deka ngurangka rega pemakai ke dijual," ku iya.
Ku iya, Sarawak deka ngenegapka penuduk nyadi kuasa besai ASEAN sereta nyaup ngagai inisiatif Grid Kuasa ASEAN lalu terus mekalka lebih elekterik sechara serantau, ti enda ngeruga guna kuasa nya ba Sarawak empu.
Ku iya, beratika rikod prestasi Sarawak ba pengawa ngemansangka kuasa hidro, nya deka ngenegapka profil iya dalam ASEAN nengah ngereska diri dalam projek hidroelektrik Kalimantan Utara.
"Kena ngemuntangka inisiatif enggau kerejasama kitai enggau Indonesia, Perintah Sarawak diatu nyingkang ke mua sereta ngembuan perambu deka numbuhka Opis Dagang enggau Dagang Temuai di Pontianak," ku iya.
Ku iya, kelimpah ari nya Sarawak mega deka ngenegapka kerejasama ekonomi enggau Menua Brunei Darussalam sereta bekerejasama rat enggau Brunei dalam sekeda sektor ekonomi nyengkaum telekomunikasyen, energi, dagang, dagang temuai enggau betanam betupi.
"Nengah pengawa numbuhka Opis Dagang enggau Dagang Temuai Sarawak di Bandar Seri Begawan enda lama agi, kitai mesti ulih sikar agi nyingkang ke mua lalu nangkap peluang ekonomi sereta ngena manah kaul strategik Brunei ngagai endur bukai di duniya," ku iya.