KUCHING: Rang Undang-Undang (RUU) kena ngaga Ordinan Kort Bumiputera Sarawak ti baru deka dipejuraika maya Aum Kunsil Negeri (DUN) ujung taun tu.
Menteri ba Opis Premier Sarawak,Datuk John Sikie Tayai madah, nya kena ngangkatka Kort Bumiputera Sarawak ngagai sistem 'independent judiciary' ti setipak enggau Kort Syariah enggau Sivil.
Sebedau transformasyen ku iya, pansik ba semua pekara bisi dipejalaika seraban konsultan dalam bulan Januari 2020 kena nentuka pematut Kort Bumiputera setipak enggau peminta guna ti majak nambah dalam jeman globalisasyen enggau digital.
Nitihku iya, tranformasyen tu udah dikemendarka perintah negeri dalam bulan Januari 2020, ti asal iya diperambu pansik dipejalaika pengelama semilan bulan, tang enda ulih ditembu baka ditetapka ba bulan oktober 2020 ketegal penanggul enda ulih diseliahka ketegal COVID-19.
“Konsultan ti dichiri bejalaika pansik udah nyerahka Ripot Kepenudi sida dalam bulan Mac taun tu. Pemutus enggau perambu deka dibantaika ngagai Kabinet Negeri ambika diperunding sereta dikemendarka.
“Siti ari ti pinta besai kena mai transformasyen ngagai Kort Adat iya nya ngererak Ordinan Kort Adat 1992 enggau Atur Kort Adat 1993, ambika diganti ngena Ordinan Kort Adat ti baru.
“Kami melabaka Rang Undang-Undang baru tu deka dibantaika dalam Kunsil Negeri (DUN) ba aum ke deka datai ila,” ku iya.
Sikie mansutka pekara tu lebuh ti nyimpul Jurai Opis Premier ba Hari Keenam Aum Kedua Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu, kemari.
“Perambu transformasyen Kort Adat Sarawak deka berengkah dikena pengudah Ordinan Kort Bumiputera Sarawak ti baru dikemendarka,” ku iya.
Nerangka pasal Ordinan Kort Bumiputera Sarawak ti dikena diatu, Sikie madahka nya mayuh bengkah Ordinan enggau Atur Rajah dipegulai maya jeman perintah Rajah, jeman koloni enggau jeman pengudah merdeka.
Opis Pengerejista, Kort Bumiputera Sarawak ditumbuhka kena 1 Jun 1993 , nya kebuah transformasyen deka dipejalaika sereta siti chara ti signifikan.
Iya madahka taun tu kort tu udah beoprasyen 29 taun lalu nyadi sebuah unit ari baruh Opis Premier Sarawak.
Opis Pengerejista Kort Bumiputera nyaga semua 66 Opis Pengerejista Kort Bumiputera ti digazet di serata negeri ku iya, lalu enggau kerejasama semua Opis Residen enggau Pelilih Menua, Ketuai Raban Bansa enggau Penghulu sereta aplikasyen sistem e-Mahkamah Bumiputera di serata Sarawak, administrasyen Kort Bumiputera dipejalaika enggau nadai bechiping.
“Nyentuk 12 Mei 2022, penyampau kes berejista iya nya 15,954 kes, sereta ari nya bisi 10,025 kes udah diputarka ti mungkur laya bekaul enggau tanah NCR entara peranak asal, ngelanggar undang-undang Kort Bumiputera enggau Adat enggau Peminta Ukai Bumiputera ambika nyadi Bumiputera iya nya bisi 62.8 peratus.
Bekaul enggau ngemanahka Bilik Kort Bumiputera ari baruh Kort Bumiputera Sarawak, Sikie madahka udah ngemanahka 21 bilik kort ba mayuh bengkah pelilih menua enggau pelilih menua mit kenyau ari taun 2015, ti begunaka ungkus belanja sepenyampau RM3.2 juta.
“Taun tu (2022), diperambu tiga bilik Kort Bumiputera deka dikemanahka agi iya nya ba Opis Pelilih Menua Lingga, Opis Pelilih Menua Daro enggau Opis Pelilih Menua Mit Medamit.
“Pengawa ngemanahka tu deka dipejalaika Opis Pemansang Negeri,” ku iya.