SIBU: Sebarang pemutus sekalika deka bediri minta pilih maya Pengawa Bepilih Besai Ke-15 (PRU15) di Parlimen Julau, Presiden Parti Rakyat Sarawak (PRS) Datuk Joseph Salang Gandum madahka deka beratika pekara nya dulu.
Lebuh dirandau pengarang berita Mmaya Pengerami Makai Lemai Aum Pengari Tiga Taun Sekali (TDC) Ke-5 PRS ba sebuah hotel tebilang ditu kena malam Hari Minggu tadi, iya madahka semina deka bediri minta pilih enti ngasaika diri iya ulih menang baru ba kerusi nya.
"Taja pia, aku nadai madah aku enggai bediri minta pilih enti parti enggau Gabungan Parti Sarawak (GPS) ngasaika aku ulih bediri minta pilih, aku deka berti dulu sekalika aku ulih bediri minta pilih tauka enda.
"Semua perambu tu tau digaga tang enda nemu kemaya pengawa bepilih diatur lalu nema ke nyadi dudi ila, sekalika perambu nya ulih dikemujurka tauka enda ketegal pekara gaya pengerai engagu sekeda pekara bukai ti mar dipelabaka," ku iya.
Salang ke mega ex-Kaban Parlimen Julau pengelama empat penggal kenyau ari taun 1999, taja pia pechaya parti nya engka deka enchalunka iya bediri minta pilih maya pengawa bepilih ila, laban beratika gaya peluang iya ngerebut baru kerusi nya.
Bejaku pasal pangku pengawa nyadi Presiden PRS enggau pangku pengawa bukai ungkup penggal baru tu, iya madahka sida udah sepenemu nadai ngatur pengawa bepilih berebutka penuduk dalam parti.
"Dalam PRS, kami udah tuai runding besaumka penemu lalu mujur sepenemu lalu kami semua udah setuju semua pangku pengawa nyadi presiden nyentuk ke pangku pengawa bukai dalam majlis besai, enda diperebutka tang kami ngisi penuduk nya," ku iya.
Dalam pekara bukai, iya ngansak kaban parti nya ngelawa tetiap bagi dalam parti pengudah TDC tu kena ngangkatka nama parti.
"Aku dekaka sida nyaup aku nempa PRS nyadi sebuah parti ti dikerinduka mensia mayuh sereta diterima semua. Berengkah ari diatu kami deka tama ngagai semua bagi dalam parti lalu meda tetiap bagi nya bisi endur dalam organisasyen kami," ku iya.
Salang mega minta pengelikun enggau tanggam kaul ke manah ba semua kaban dalam parti seruran dikemeratka awakka ulih sepenemu lebuh ke gawa.
"Tu beguna amat kena ngemurka semua pengawa bekaul enggau parti lalu amb ika kami ulih meri servis ke pemadu manah ngagai rayat," ku iya.
Ba PRU14 2008 lebuh ke betengali alan ngerebut kerusi Parlimen Julau, Larry Sng Wei Shien ke nyadi chalun bediri ngatika diri mujur ngalahka Salang enggau majoriti 1,931 undi.
Sng ke diatu nyadi Presiden Parti Bangsa Malaysia (PBM) mujur bulih 10,105 undi lalu Salang bulih 8,174 undi.
Sama bisi maya nya, Sapit Presiden PRS Dato Majang Renggi, Mandal Presiden Kanan PRS Datuk John Sikie Tayai, Sekretari Besai PRS Dato Janang Bunsu enggau kaban parti ke bukai.