Nama ti pemadu beguna iya nya nembiak ulih jampat 'gerai' ari empas PdPR dua taun ti udah, ku STU
“Kitai udah kelalu lama sereta jauh tinggal ari sukut timpuh ungkup nembiak sekula neruska pelajar sida.”Adam Prakash Abdullah
Presiden STU
KUCHING: Pengudah dipadahka sesi besekula nadai agi begintir ungkup nembiak sekula primari deka ulih mulaika pemanah sistem pelajar menua ti tekeruga ketegal pandemik COVID-19.
Presiden Gempung Gerempung Pengajar Sarawak (STU) Adam Prakash Abdullah madah, nama ti beguna iya nya ungkup nembiak sekula ulih jampat 'gerai' ari kena empas pengawa ngajar enggau belajar ari rumah (PdPR) dua taun ti udah.
“Kitai udah kelalu lama sereta jauh tinggal ari sukut timpuh ungkup nembiak sekula neruska pelajar sida.
“Dua taun udah betapi enggau penanggul dalam sistem besekula ketegal pandemik COVID-19 udah meri empas ti negatif ngagai nembiak kitai,” ku iya lebuh ti ditanya Utusan Borneo kemari.
Iya nambah, 'norma' penatai ke sekula mega udah nyadi enda sama lalu enda agi dikiruhka.
“Tu ti ngasuh pengawa manah sebedau tu bisi dilengkaka lalu nyadi ngelusu ba nembiak sekula.
“Pia mega lebuh Opis Menteri Pelajar Malaysia (KPM) udah ngaga pemutus ngagai semua nembiak sekula primari besekula lalu enda begintir, tu udah tentu deka mulaika pemanah sistem pelajar kitai,” ku iya.
Nitih ku Adam, STU nerima manah pemutus tu nama agi menua udah betukar ngagai fasa endemik kena 1 April nyin tadi.
“Kitai udah dalam fasa endemik COVID-19 lalu komuniti mega udah diajar enggau chara idup begulai enggau igi penyakit tu.
“Nya alai, STU minta ngambika ngemeran pengidup ti gerai enggau beresi diteruska lalu nyadi pengawa ti digaga ninting hari ngambika kitai enda terunda-runda sereta ilap dalam pengawa ngatur diri ninting hari,” ku iya.
Iya mega ngarap enggau jaku tangkan nya, apai indai deka sama bejalaika tanggungpengawa mesan bala anak ngambika seruran nyaga diri, ngasika pengajar ti meri penemu lalu terus ngemeranka gaya idup ti bepengerai.
Pia mega, iya minta semua Gerempung Apai Indai enggau Pengajar (PIBG) ulih aktif agi ngambika pengawa ngatur pelajar bala anak ulih nyadi tanggungpengawa semua raban.
Kena 8 April nyin tadi, KPM mutuska iya nya semua nembiak dikemendar datai ke sekula primari betunga mua ti enda ngena chara begintir beregnkah 17 April tu ungkup nengeri Kategori A lalu 18 april ungkup nengeri Kategori B.
Menteri Kanan Pelajar Datuk Dr Radzi Jidin madah, pemutus tu digaga pengudah meda proses sesi besekula betunga mua ti beginti ungkup sekula primari kenyau ari 21 Mac nyin tadi enggau sesi besekula betunga mua ti nadai begintir ungkup sekula sekondari kenyau ari 4 April nyin tadi.
Nengeri Kategori A iya nya sekula di Kedah, Johor, Kelantan enggau Terengganu lalu Kategori B iya nya ungkup sekula di Perlis, Pulau Pinang, Perak, Selangor, Negeri Sembilan, Melaka, Pahang, Sabah, Sarawak, Wilayah Persekutuan Kuala Lumpur, Labuan sereta Putrajaya.