SIBU: Kepala Menteri Datuk Patinggi Tan Sri Abang Johari Tun Openg megai nengeri tu enggau chara 'futuristik' ti meri kelala ekonomi digital sereta pengawa ngena teknologi dalam aktiviti ekonomi baka betanam betupi nyengkaum pemansang raban nembiak.
Kaban Kunsil Nengeri (ADUN) Daro Safiee Ahmad madah, polisi ti dipejalaika nya ngemeratka semua aspek pengidup rayat nyengkaum sekeda bidang taja dalam kuasa perintah besai baka pelajar ti ngaul sekula, perintah nengeri sanggup meri sukung ngena agih belanja diri empu ungkup pemujur bala anak Sarawak jemah ila.
“Pengudah nya, taja maya iya (Abang Johari) nyadi Kepala Menteri, dunya, menua enggau nengeri tu dituntung penusah penyakit COVID-19 tang mujur betapi enggau pemar nya.
“Dalam mayuh pekara nengeri Sarawak seruran ke mua ari sukut pengawa meri bantu pengelantang pengidup ngagai rayat nengeah Bantu Khas Sarawakku Sayang (BKSS) 1 nyentukka 6.
“Program pengelantang enggau pengerai rayat nengah Komiti Mutarka Penusah Ngenyit Nengeri (JPBN) Sarawak baka program vaksinasyen ti dulu tembu ari nengeri bukai.
“Semua nya mujur dipejalaika berindik ari pengelandik Kepala Menteri megai Sarawak enggau nambahka agih belanja asil ngagai nengeri tu nengah mayuh macham chara ekonomi baru ti dibantaika nyengkaum meri chukai ngagai asil minyak enggau gis,” ku iya nengah siti penerang ditu, kemari.
Ku iya, pemujur ti pemadu besai iya nya ngayanka rayat pechaya nengah pegai Kepala Menteri lalu mujur ngerikodka sejarah menang 76 kerusi ari 82 kerusi DUN ti diperebutka maya Pengawa Bepilih Nengeri (PRN) Sarawak Ke-12.
“Tu ngayanka pengeransing sereta pemendar Kepala Menteri deka nyadika nengeri Sarawak nyadi nengeri ti pemadu mansang datai ba taun 2030 ti dipechaya enggau ditemu rayat setipak enggau 34 inisiatif manifesto enggau lebih 100 manifesto pemansang iya.
“Aku pechaya, enggau momentum chara iya megai, insya-Allah, kitai pechaya iya nya kitai diatu ba jalai ti manah enggau betul kena nyapai status nengeri mansang datai ba taun 2030,” ku iya.
Safiee meri besai pengaga ati ngagai Abang Johari beserimbai enggau taun kelima iya dichiri nyadi Kepala Menteri.
Ku iya, Abang Johari iya nya siku ketuai ti endang ngemeratka pengelantang pendiau rayat ke alai peranak di menua pesisir enda kala dilengka.
“Pemansang di kandang menua pesisir nyata dipeda lalu tu ngayanka pengeransing iya dalam ngangkatmanah sosioekonomi rayat di kandang menua pesisir.
“Pengeransing Datuk Patinggi Tan Sri Abang Johari ngagai pemansang di menua pesisir mega ulih dipeda ari pengawa ngaga projek infrastruktur enggau perengkaguna pemun baka projek pemansang ngaga jematan, jalai alun, bekal elekterik, ai enggau telekomunikasyen ti majak dikerembai di kandang menua pesisir,” ku iya.
Iya mega nambah, pengawa manah Kepala Menteri dalam megai nengeri Sarawak ari mayuh macham aspek endang nyata baka numbuhka Petros, DBOS, SMA sereta ngangkatka kualiti pelajar anak Sarawak nyengkaum numbuhka sekula enggau ejensi pelajar tinggi tikas dunya.