KUCHING: Skim Bantuan Deposit Perumahan (HDAS) ti dibantaika kena mantu raban bepenatai pemisi mit (B40) enggau jelan pemesai (M40) awakka ulih meli rumah kediri empu, deka berengkah dipejalaika taun tu.
Ku Kepala Menteri Datuk Patinggi Tan Sri Abang Johari Tun Openg (gambar), perintah Sarawak deka mantu raban nya nengah chara mayar deposit nyentuk maksima RM10,000.
"Reti nya, enti sida deka meli rumah ke berega RM300,000 ke baruh, perintah deka mantu mayar deposit nyentuk ke maksima RM10,000. Tu khas ungkup orang biak ti beumur urung 26 nyentuk 30 taun ti udah belaki tauka bebini, lalu duit galau sida enda chukup kena meli rumah.
"Enti deka meli rumah, enggai enda pan nganti duit ke ditaruh sida chukup kena mayar deposit," ku iya madah maya aum media pengudah nyadi chairman Aum Kaunsil Besai PBB ba Palan Konvensyen Borneo Kuching (BCCK) ditu, malam Hari Minggu nyin tadi.
Nya alai kena mantu raban nya, perintah Gabungan Parti Sarawak (GPS) ku Abang Johari, deka nyendiaka agih belanja ke tuju nya.
Nya ku iya, ngemudahka rayat meli rumah kediri maya umur agi biak.
"Enti meli rumah maya umur 40 nyentuk 45 taun, timpuh mayar nya pandak lalu sida deka mayar lebih. Tang enti meli rumah maya umur 27 tauka 28 taun, timpuh mayar nya panjai lalu penyampau ke dibayar nya enda besai," ku iya.
Nirihka anggar iya maya mangku portfolio Menteri Pengawa Berumah suba, penyampau unit rumah ti udah tembu digaga ninting tahun ke dijual bisi urung 2,500 unit."
Reti nya bisi 2,000 tauka 2,500 unit rumah, kami mesti ngungkupka RM25 juta setaun," ku iya seraya arap amat Sarawak ulih neruska polisi nya asil ari jalai penatai pemisi ke diulih.
Sebedau tu, perintah Sarawak udah ngungkupka RM10 juta ari baruh skim nya nengah Bajet Negeri 2022.
Berebak enggau nya, Abang Johari mega madahka GPS deka meri bantu ngagai rayat Sarawak ti napi pemar ketegal ampuh bah di Semenanjung.
"Rayat Sarawak ke diau di Semenanjung ti napi pemar ketegal ampuh bah ba sekeda negeri din bedau lama udah,tau minta bantu nengah Opis Rumah Sarawak di Kuala Lumpur," ku iya.