GEDONG: Sitak Gedong ke suba iya nya sebuah genturung pendiau mit diatu udah nyadi pelilih menua penuh enggau pengawa bejadika nya udah dipejalaika Kepala Menteri Datuk Patinggi Tan Sri Abang Johari Tun Openg kemari.
Lebuh ti bejaku ba pengerami bejadika Gedong nyadi pelilih menua di Dewan Datuk Patinggi Ali ditu, Abang johari madahka enggau pengawa ngenukuka tu, Gedong udah tentu ngembuan raban pengatur kediri empu ungkup servis ti positif enggau manah agi.
"Asil ari pansik tikas pengulih bejalaika pengawa perintah nengeri, lima palan ngatur pengawa baru udah ditumbuhka iya nya lima pelilih menua enggau sebuah pelilih menua mit ti mungkur bagi menua Samarahan, Serian enggau Sri Aman.
"Kelimpah ari Gedong, empat agi sitak iya nya Siburan, Sebuyau, Lingga enggau Pantu diangkat nyadi pelilih menua penuh lalu Balai ringin nyadi pelilih menua mit," ku iya.
Ku Abang Johari nambah, peminta ngangkatka Gedong nyadi pelilih menua diterima Datuk Naroden Majais ti mega penyandang kerusi sitak Gedong.
"Endang amat, aku udah nerima peminta ari Naroden nyadika Gedong tu pelilih menua mit.
"Tang pengudah dipansik, nya alai aku ngaga pemutus ungkup Gedong tu diangkat terus nyadi pelilih menua penuh," ku iya.
Berindik ari pengawa ngenukuka Gedong nyadi pelilih menua penuh, perintah nengeri nitih ku Abang Johari deka ngemansangka Gedong nengah Ejensi Pemansang Kandang Menua Besai Samarahan (IRSDA).
"Kitai deka ngemansang sereta ngatur pemansang nengah IRSDA di Gedong lalu nyadika Gedong sebuah Pekan Satelit ti ulih ngubah gaya pengidup rayat di kandang menua tu.
"Kitai mega deka ngemansangka perengkaguna baka hotel kelimpah ari 'Homestay' ke endang udah bisi sereta servis ke bukai ti chukup diguna.
"Tu iya nya perambu kitai lalu aku ti nyadi kepala menteri deka nentuka nama ti dilangkar tu deka nyadi realiti," ku iya.
Lebuh pengerami tu, Abang Johari ti mega chalun Gabungan Parti Sarawak (GPS) ungkup kerusi sitak Kunsil Nengeri (DUN) Gedong beterima kasih ngagai penyandang kerusi Datuk Naroden Majais ke udah bebendar ngemansangka Gedong enggau Simunjan.
Kelimpah ngemunka Gedong nyadi pelilih menua, Abang Johari mega udah nyuaka chek pampas tanah ungkup Projek Jalai Lubok Teranggas ke Kampung Gedong sereta Projek Ngangkatmanah Jalai Lubok Samsu/Kampung Steman.
Pemayuh penerima pampas tu iya nya bisi 37 iku enggau penyampau semua iya nya RM5.35 juta.
Sama bisi disuaka iya nya lisin peranak sementara (TOL) ungkup Skim Ngemesaika Kampung Masjid Gedong Fasa II ngagai 14 penerima ti ngaul 14 lot.
Sama bisi datai Sekretari Perintah Nengeri Datuk Amar Jaul Samion enggau Menteri Dagang Temuai, Seni enggau Main Asal Datuk Seri Nancy Shukri sereta Kaban Parlimen Batang Sadong.