KUCHING: Nadai isu bekaul enggau nyual alkohol di Sarawak laban nengeri tu ngembuan ordinan kediri empu kena ngaga pemutus bekaul enggau pekara nya.
Presiden Parti Rakyat Bersatu Sarawak (SUPP) Dato Sri Dr Sim Kui Hian madah,Ordinan Opis Bekuasa Kandang Menua1996 meri autonomi ngagai Sarawak ngaga pemutus bekaul enggau isu tu.
“Mayuh ti enda nemu nama ke nyadi di Semenanjung Malaysia enda dikena ditu.
“Di Sarawak, alkohol ukai siti isu. Enti bisi sesapa di Sarawak nyerungkai pekara nya, ba aku nya semina digaga ketegal bisi pemerat ba pekara politik tauka semina kena ngiga mencari publisiti saja, ku iya.
Dr Sim bejaku munyi nya ba aum media bekaul enggau ripot kereja lima taun iya nyadi pengari rayat di Batu Kawah kenyau ari taun 2016 nyen tuk ke taun 2021, ditu kemari.
Ku iya, amat enda nyamai ati meda, ninting hari di Semenanjung Malaysia seruran bisi isu nyadi ti mandangka polarisasi enggau ekstremisme nyengkaum isu ‘Timah’ (chap alkohol) enggau pekara bukai.
“(Taja pia) mujur mih dalam isu tu (nyual alkohol) kitai bisi autonomi ukena ngaga pemutus nyual alkohol ari baruh Ordinan Opis Bekuasa Kandang Menua 1996,” ku iya.
Berebak enggau nya, Dr Sim mega lalu ngelancharka ‘Batu Kawah War Truck’ ke dikena bekimpin ti deka berengkah lemai kemari (7 Disember).