KUCHING: Tikas pengirau ati ti baruh dalam rayat Sarawak sentang betuchuk vaksin COVID-19 entara kebuah pemujur Program Imunisasi COVID-19 Menua (PICK) di nengeri tu.
Penyanding Penemu Komiti Mutarka Penusah Ngenyit Nengeri SArawak (JPBNS) Dato Sri Dr Sim Kui Hian madah, iya beterima kasih ngagai rayat Sarawak laban ti udah bejalaika tanggungpengawa berat dalam ngelaban igi penyakit COVID-19.
Nitih ku iya, kerejasama mayuh raban udah ngujungka penyampau tuchuk vaksin di nengeri tu udah dulu ari nengeri pia mega ari menua bukai.
“Aku endang chukup andal ati laban enda mayuh rayat kitai ti kakang ati betuchuk vaksin laban nyema enda, kitai nyangka enda ulih nuchuk vaksin ngagai semua rayat.
“Kebuah pia, nuchuk vaksin tu patut dipadahka sereta dipesetuju sebedau nerima vaksin, nadai sapa pan ti mejal kita. Pemujur tu endang ngayanka solidariti rayat Sarawak,” ku iya lebuh ti datai ba program vaksinasyen orang lunggar umur Flat KMC ba Jalai Padungan ditu, kemari.
Ku iya madah, pemerat vaksinasyen tu iya nya kena nyelamatka nyawamensia mayuh, kelebih agi sepital di nengeri tu pan udah nyapai kapasiti penuh lalu udah mega muka mayuh Palan Kuarantin Risiko Baruh COVID-19 (PKRC).
“Berindik ari nya, pengawa nuchuk vaksin diteruska lalu dichakahka agi laban kitai deka nyaga pengidup rayat.
“Pia mega sida ulih bulih baru pengelantang baka sebedau tu tang enggau gaya ‘norma’ baru,” ku iya.
“Berindik ari nya, terima kasih ngagai semua raban laban udah bejalaika tanggungpengawa diri, ukai semina raban terabai menua tang mega penerima vaksin ti udah ngerejista sereta data maya atur semaya sida,” ku iya nambah.
Iya mega meri besai terima kasih ngagai perintah besai enggau perintah nengeri aban ti udah nyendiaka bekal vaksin ungkup rayat nengeri tu.
Bejaku bekaul enggau program vaksinasyen orang lunggar umur Flat KMC, Dr Sim madah, bisi 107 peranak ti diau di flat nya iya nya orang lunggar umur udah diatur betuchuk vaksin ba Palan Betuchuk Vaksin (PPV) Klinik Pengerai Tanah Putih kemari.
Ari penyampau nya, ku iya, bisi 11 iku orang lunggar umur enda ngembuan perengka pengangkut deka dibai ke PPV nya ngena servis bas ti disediaka ke enda babayar ari perintah Sarawak.
Sama bisi, Datuk Bandar Opis Kaunsil Mengeri Kuching Selatan (MBKS) Dato Wee Hong Seng.