KUCHING: Komiti Mutarka Penusah Ngenyit Nengeri Sarawak (JPBNS) mutuska Atur Nagang Pemindah (PKP) deka disambung di serata nengeri Sarawak.
JPBNS madah munyi nya laban beratika kes COVID-19 ke agi tinggi, lalu ari aum ti diatur ejensi nya bedau lama tu tadi mutuska timpuh PKP disambung ngagai 28 Jun 2021.
Sapit Kepala Menteri ti mega nyadi chairman JPBNS madahka Sarawak nitihka sambung PKP nya baka ke udah di padah ba renggat menua, iya nya ari 15 Jun nyentuk 28 Jun 2021.
“Atur tu dipejalai di selampur menua Malaysi... Au, kitai nitihka atur perintah besai,” ku Uggah lebuh ditanya pasal pekara tu ensanus.
Enti nitih, PKP di Sarawak patut abis timpuh kena 14 Jun (pagila).
Bedau lama tu tadi, Menteri Kanan (Kluster Pengelikun) Datuk Seri Ismail Sabri madahka PKP 3.0 deka disambung ari 15 Jun ngagai 28 Jun tu.
Ismail madahka pemutus nya digaga maya aum Kaunsil Pengelikun Menua (MKN) ti bechairmanka Menteri Besai, Tan Sri Muhyiddin Yassin, sereta bepelasarka penemu ari Opis Menteri Pengerai (KKM).
“Pemutus nya digaga lebuh berundingka penyampau kes baru (COVID-19) agi tinggi, lebih ari 5,000 kes sehari, enggau pukul rata kes baru naka kemari (ensanus) manggai 6,871,” ku Muhyiddin madah nengah jaku penerang iya bekaul enggau kes COVID-19.
Nangkan nya, Ismail nambah, Prosedur Operasyen Standard (SOP) sereta rintai pengawa ke dikemendarka iya nya kilang, pengawa dagang enggau industri agi sebaka, baka ke udah dipadah sebedau tu, lalu ulih dipeda tauka dibacha nengah laman web MKN.
Atur PKP tauka ‘full lockdown” digaga kena 1 Jun tu tadi, bepun ari kes COVID-19 baru ke tinggi, ngelui 7,000 kes ujung bulan Mei tu tadi.