TATAU: Bisi 1,072 peranak udah nerima tuchuk vaksin dos keterubah ba Palan Meri Vaksin (PPV) COVID-19 dalam Program Imunisasi COVID-19 Menua (PICK) ba Balai Lumba enggau Main Tatau kenyau ari Hari Satu nyentuk Hari Tiga tu tadi.
Tuchuk vaksin tu khas ungkup orang lunggar umur sereta sida ti bisi risiko kena rampit di pelilih menua tu ke alai udah dipejalaika enggau manah ari raban Opis Menteri Pengerai Malaysia (KKM) enggau bantu ari bala pengereja pengawa volunteer MyVAC (Malaysia Vaccine Support Volunteers), Opis Volunteer Malaysia (RELA), Polis Diraja Malaysia (PDRM), Raban Penyaga Pengelikun Periman Malaysia (APM) enggau pengereja pengawa ba Opis Pelilih Menua Tatau.
Komiti Khas Jaminan AKses Bekalan Vaksin COVID-19 (JKJAV) nengah pun pemisi penerang KKM madahka vaksin ti bisi antigen kena ngeregaska sistem ngelaban penyakit berampit dalam tubuh lalu ngadaka imuniti ari kena rampit penyakit khas.
Vaksin COVID-19 ngeregaska sistem imun ngambika nyema kitai betapi enggau Koronavirus SARS-CoV-2 (severe acute respiratory syndrome coronavirus 2), tubuh kitai ulih ngelaban kena rampit COVID-19.
Mayuh platform baka rurun genetik RNA, viral vektor, virus ‘nyahaktif’ enggau sub-unit protein udah dikena dalam nyendiaka vaksin koronavirus ti likun sereta engkeman. Tu meri pelindung ti manah ngagai COVID-19, ku penerang ari KKM nya nambah.