SIBU: Taja pan semina nyadi pelakun tambah, Sammy Ngelambai, 63, tetap temegah agi laban bisi enggau ngaga filem indie ‘Belaban Hidup: Infeksi Zombie’ ti udah menang anugerah ‘Filem Terbaik’ enggau ‘Filem Seram Terbaik’ ba International Symbolic Art Film Festival (ISAFF) di St Petersburg, Rusia bulan siti nyin tadi.
Kebuah pia, filem nya mantaika seni enggau budaya raban bansa Dayak kelebih agi bansa Iban, kelebih agi ngepan bujang berani Iban ti majak nadai dikena tauka jarang dipeda ba dunya diatu, dibantaika ngagai mensia mayuh ba renggat antarabansa.
“Aku berasai amat temegah ati laban ngepan bujang berani Iban tu bisi nyaup menang anugerah antarabansa nya, ti mandangka kostum nya nyau majak ayas dipeda kenyau ari suba,” ku iya ke mega orang ke ngaga ngepan ti dikumbai ‘gagung’ nya.
Gagung iya nya ves ti digaga ari kulit jelu lalu diiyas ngena rantai pirak, taring babi, keruntuk kera, pedang panjai enggau pengias ba pala ti disikap ngena tangkung kenyalang tauka pala burung kenyalang (tulin tauka digaga ari fiber glass) enggau bulu kenyalang.
“Gagung tu engka tau ditemu ba seberang endur di Sarawak, tang chara ngena nya mesti betul taja pan bida ba chara ngena ba raban bansa Iban ba sekeda menua,” ku iya ke mega penengkebang Kelab Gagung Sarawak dalam taun 2004.
Sammy enggau semilan iku agi kaban Kelab Gagung Sarawak ngaga filem ‘Belaban Hidup: Infeksi Zombie’ berengkah pengudah ke diterima producer Misha Minut, nyadi orang ke ngaga ngepan bujang berani Iban ungkup filem nya, kelimpah nyadi pelakun tambah enggau nyadi referan sentang chara ke betul ngena ngepan nya.
Semilan iku kaban Kelab Gagung Sarawak ke bela enggau belakun dalam filem nya baka Binar Berayun, Leighton Manjah, Noel Tony, Kembuan Thomas, Jabang Juntan, Fabian Masing, Martin Bilun, Bos Tupa enggau Dennis Tan.
Sammy berasai nyamai gawa enggau direktor filem nya, Ray Lee nya, Minut ke dipeda ulih nerima penemu enggau jaku lalau bekaul bagi ba cherita nya ti bekaul enggau kelab, sedia nerima enti dipinta belakun baru dudi ila.
Berebak enggau nya, Binar, 61, madahka enggau ngaga filem nya begulai enggau pelakun ti endang udah tebilang di Malaysia enggau menua tasik enda peneleba ke amat berega seraya ngarapka bisi orang bukai ba bansa Dayak di Sarawak ti tau dibantaika ba dunya filem ngambika dikelala di serata dunya.
“Ngarapka perintah meri agih belanja kena ngaga filem ti mantaika budaya enggau adat raban bansa Dayak kelebih agi Iban laban nya tau ‘dijual’ ba renggat antarabansa,” ku iya lebuh ke dirandau maya ke diatu di Bintulu.
Kelimpah ISAFF, ‘Belaban Hidup: Infeksi Zombie’ ti dikeluarka Hornbill Films Sdn Bhd enggau Harry Aziz Entertainment Sdn Bhd nya nempa sejarah lebuh menang ba kategori ‘Seram dan Sains Fiksyen’ ungkup genre ‘filem cereka’ ba World Film Carnival Singapore 2021 kena 18 Mac tu tadi.
Filem nya mega bisi dichalunka di Los Angeles Marina Del Rey Film Festival (LAMDRFF) ungkup kategori ‘Filem Cereka Terbaik’.
Nya nyetitaka seraban anak patu balu ke dikurung ngambika nyadi utai pansik siku saintis gila ti nyampurka elemen ngenakut enggau gaya raban bansa Dayak di Sarawak.
Filem ti bulih belanja kena ngaga nya ari Perbadanan Kemajuan Filem Nasional Malaysia (Finas) nya mantaika bala pelakun menua tu baka Pekin Ibrahim, Altimet, Pablo Amirul, Anna Melissa, Cassidy Panggau enggau penanyi Indonesia, Tegar sereta pelakun peranak Slovakia, Katrina Grey.
Filem ti disadung Metrowealth Pictures Sdn Bhd nya dipelaba ditayangka ba panggung wayang dalam bulan Ogos. — Bernama