BINTULU: Semua serap mensia mayuh enggau pupu bansa diansak besaup ngelaban pandemik COVID-19 di Bagi Menua Bintulu kelebih agi maya ngintu pengerami, enda lama agi.
Kaban Parlimen Bintulu,Datuk Seri Tiong King Sing madah, mensia mayuh anang enda beratka sereta sepenemu besaup ngelaban penyakit tu nyentuk ke punas, taja pan penyampau kes positif dalam timpuh dua hari bejurut tu bisi kurang.
Ku iya, gaya ke nyadi sebedau tu patut nyadi ke teladan, laban enti kitai enda bejejimat, penyakit tu tau ngadaka gelumbang baru nyentuk ke ngeruga pengerai enggau nyawa semua orang nyengkaum ngeruga ekonomi kitai.
“Aku udah betemu enggau bala ketuai bansa ari kandang menua Jepak, Kemena, Tanjung Batu enggau Samalaju beberapa hari ke udah, berandauka chara nagang pengelekai penyakit maya ngintu pengerami Hari Raya Aidilfitri enda lama agi," ku iya nengah penerang berita kemari.
Lebuh ke berandau nya ku iya, iya minta bala ketuai nya besaup ngelaban penyakit tu sereta nentuka pengerami Aidilfitrike deka diintu enda lama agi enda ngemuntanka pengawa ngemunaska penyakit tu.
“Aku minta bala ketuai raban bansa ngenataika pesan tu ngagai komuniti Melayu ngambika anang begempuru tauka ngabang ngagai kaban belayan enggau bala bakih maya pengerami nya," ku iya.
Berebak enggau nya ku iya, bala ketuai bansa mega nyu kung jaku lalau iya ngambika orang ke di luar zon tauka luar pelilih Bintulu anang mulaika diri ngagai menua sida maya ngintu Hari Raya Aidilfitri tu.
“Kitai mesti liat ati lalu anang mindah kin kitu ngabang ngagai kaban belayan tauka bala bakih maya pengerami nya," ku iya.
Tja pan graf penyakit tu bisi manah mimit ku iya, kitai anang enda berat sereta majak chakah agi gawa ngambika pengawa semua rayat Bintulu ti udah besaup ngurangka rampit penyakit ngelama tu enda tebasau pia aja.
“Aku mega ngelalau mensia mayuh ke alai statistik data kes ti disahka di Bintulu dalam satu tauka dua hari ke udah endang asil ari pengawa semua, kitai mesti ingat ngambika majak nitihka SOP sereta anang mindah ari rumah enti nadai pekara berat," ku iya.