LIMBANG: Rayat enda ibuh takut tauka nangi nerima tuchuk vaksin COVID-19 lalu ngena nya nyadika peluang ti enda bebayar ari perintah.
Menteri Muda Betanam Betupi Moden, Tanah Adat enggau Pemansang Kandang Menua Datuk Dr Abdul Rahman Ismail madah, rayat mega diansak ngambika lengkas ngerejista diri nyereta Program Imunisasi COVID-19 Menua (PICK) nengah aplikasyen MySejahtera enggau mega ngena chara manual.
“Pengawa ngambi vaksin tu ulih nyaga kitai enggau komuniti seraya ulih nyeliahka penyakit tu terus ngelekai.
“Lebuh udah mayuh kitai nerima tuchuk vaksin tu, nya ti ngujungka menua kitai tu ulih likun agi,” ku iya maya Pengerami Nyuaka Geran Ungkup Masjid enggau Surau ungkup sitak Bukit Kota ba Masjid Baitul Iman Pelilih Menua Limbang kemari.
Sama bisi enggau iya Residen Bagi Menua Limbang Ir Ahmad Denney Ahmad Fauzi, Pemesai Opis Pelilih Menua Limbang Superi Awang Said, Pemesai Opis Jalai Pengarap Islam Sarawak Bagi Menua Limbang Ustaz Awang Abdul Rahim Awang Rosli enggau Pemancha Abu Tinggal.
Iya ti mega Kaban Kunsil Nengeri (ADUN) Bukit Kota nya madahka pengawa ngambi vaksin tu endang beguna dalam betapi enggau igi penyakit baru tu ti nyadi selampur menua.
“Mayuh ari rayat agi takut enggau vaksinasi sereta bisi mega penerang ti enda betul udah dikerembaika.
“Vaksin tu endang likun laban udah nengah mayuh macham renggat lalu diatu nadai empas ti enda manah nyadi lalu bala lutur sereta raban profesional dalam bidang perubat mega bebendar deka ngelaban igi penyakit tu nengah pengawa meri vaksin,” ku iya.
Nitih ku iya, pengelekai igi penyakit COVID-19 dalam komuniti di nengeri tu ulih nyadi enggau jampat nyema komuniti agi enda tentu kiruh ngemeranka prosedur operaysen standard (SOP) ba diri empu.
“Komuniti mesti ngasika SOP ti udah ditetapka nyengkaum ngena sengkabung idung enggau nyawa, ngemeranka seraka fizikal semeter lalu suah nuchi enggau meresika jari ti nyadi gaya idup ke mesti dipejalaika ninting hari.
“Kelimpah ari pengawa ti udah digaga perintah nyengkaum Opis Pengerai Malaysia (KKM) dalam nagang pengelekai COVID-19, ke pemadu berat komuniti tu empu bejalaika tanggungpengawa dalam nagang pengelekai kena rampit igi penyakit tu,” ku iya.
Dulu ari nya, bisi 77 iku pengari masjid enggau surau ba sitak Bukit Kota nerima Projek Mit Menua Pesisir (MRP) ari baruh ADUN Bukit Kota ti ngaul ungkus RM224,000 penyampau semua nya.