SARIKEI: Kaban Kunsil Nengeri Meluan, Rolland Duat Jubin nyemetak madahka iya deka majak mai mayuh macham pemansang ngagai siatk Kunsil Nengeri (DUN) Meluan, kena nentuka rayat ba sitak nya ngasaika pemansang ke patut.
Ku iya, fokus pemansang iya nya sukut bekaul pemansang sosial, ekonomi, infrastruktur, sekula, telekomunikasyen enggau perengkaguna ke bukai.
“Kena nentuka juluk tu ulih dijapai, sukung penuh enggau kerejasamarayat beguna amat.
“Pekara tu beguna amat kena nentuka tetiap pemansang ti diperambu ulih dipejalaika enggau lanchar sereta diasaika rayat ba renggat nembiak redak,” ku iya lebuh ke nemuai seraya kereja ngagai pada Rumah Brayan Lanyau, Rantau Rusa, Julau bedau lama udah.
Ku iya, rumah panjai tu bisi 21 pintu lalu sepenyauh 160 kilometer ari Sarikei.
Ku iya, rayat patut nemu Perintah Sarawak diatu bebendar ngerapitka seraka pemansang di mengeri enggau menua pesisir nengah bemacham pelin lalu aktiviti pemansang benung dipejalaika.
Pejalai ke rumah panjai urung tiga jam ngena kerita 4WD nyentuk ke Nanga Bulo.
Ari Nanga Bulo, pejalani ditampung ngena bangkung pengelama 30 minit ngagai rumah panjai tu.
Lebuh ke nemuai nya, Rolland madahka Perintah Sarawak u dah ngemendarka agih belanja sepenyampau RM200,000 ungkup peranak rumah panjai nya kena mantu ngulihka perengka dikena ngaga rumah panjai baru.
Ku Rolland, iya semampai siru enggau utai ke diguna peranak di sitak Meluan sereta majak nyaup ngangkatmanah rumah panjai nitihka pematut ke dulu.
“Nya alai, kami minta peranak ditu majak meri kerejasama ngagai perintah ngambika ulih ngemajakka pemansang ti udah di perambu ke pengelantang rayat.
“Kami seruran naka ulih mai pemansang infrastruktur, telekomunikasyen enggau perengkaguna ngambika kandang menua ulu entigis baka Meluan enda tinggal jauh ari arus pemansang,” ku iya.
Iya mega bisi nyuaka geran sepenyampau RM21,000 ngagai Komiti Pemansang enggau Pengelikun Genturung Pendiau (JKKK) Rumah Brayan ngambika bisi dikena ngemujurka semua aktiviti enggau program.
Sama bisi enggau ba penemuai nya, Injinir Opis Parit enggau Entali Ai Opis Parit enggau Entali Ai Bagi Menua Sarikei, Octavius Stanley Peter, Penghulu Robert Datu enggau Kunsilor Tik Lakin.