SRI AMAN: Program Ngabas Taba Projek Tranformasyen Menua Pesisir (RTP) Menteri Muda Pengelantang Komuniti, Datuk Francis Harden Hollis mai berita manah ngagai enam buah rumah panjai enggau sebuah sekula primari dalam sitak Kunsil Nengeri (DUN) Simanggang, kemari.
Berita manah ti dipadahka Harden ngagai peranak rumah panjai, iya nya sentang pengawa ngaga projek di rumah panjai sida ngena agih belanja RTP taun tu.
Ku Harden, ungkup Sekula Peimari (SK) Nanga Skrang pengeran ati Serakup Apai Indau enggau Pengajar (PIBG) deka bisi Balai Mayuh Guna nyauka nyadi nyata pengudah isu tanah perambu alai nirika bengunan nya teputar lalu pengawa ngaga nya dikemendarka ngena ungkus RM250,000.
“Rumah panjai ke bulih pemaik ari projek nya baka Rumah Belai Antot, Brangan Ili nengah projek ngemanah laman rumah panjai, nyemin ke beungkus RM50,000.
“Pia mega Rumah Thomas Ramba, Brangan Hulu ke bulih projek naik ngemanah laman rumah panjai, nyemin ke beungkus RM100,000 lalu ejensi ti bejalaika pengawa nya, Opis Kereja Raya (JKR) Bahagian Sri Aman,” ku iya.
Ungkup Rumah Romeneo Tugang, Nanga Skrang Hulu enggau Rumah James Tekat Ranggie diagihka belanja kena ngaga parit enggau terunggu ke beungkus RM100,000 ari baruh Opis Parit enggau Entali Ai (JPS) Bagi Menua Sri Aman.
“Rumah Madeline Banda, Teluk Sebuyau, Nanga Skrang mega bisi ampit pengudah peminta ngaga jalai ari rumah panjai ke gereja dikemendarka beungkus RM50,000 enggau Rumah Andrew Layau, Langkong, Nanga Skrang diungkupka RM50,000 kena ngemanah rumah panjai ti dipejalaika JKR Bagi Menua Sri Aman,” ku iya.
Berebak enggau nya, Harden madahka perintah GPS seruran gawa enggau naka ulih ke rayat ti begunaka bantu nengah peminta sida.
“Kami semina ngamatka semaya ngambika penanggul ditapi sida ulih diputarka lalu empas nya meri pengelantang ngagai rayat,” ku iya.
Ku iya baru, musim tu mayuh individu begedika perintah lalu parti penyakal ngeluluka diri deka gawa ke sida enggau manah agi. Rayat di menua pesisir kelebih agi di rumah panjai saru runding enggau isu sereta sentimen ti dibai sida.
Ku iya, di Nanga Skrang aja semua agih belanja udah dikemendarka iya nya RM700,000.