MIRI: Gerempung Pengarang Berita Utara Sarawak (NSJA) deka meri insentif ngagai anak kaban nya ti mujur bulih pemutus peresa ti nyulut dalam akademik enggau kokurikulum taun nyin kemari.
Presiden NSJA Andy Jong madah, taun tu iya nya edisyen kelima gerempung nya meri insentif bansa tu ngagai anak kaban gerempung nya.
“Insentif tu diberi ungkup tuju meri peransang ngagai sida ngambika terus bebendar belajar lalu teulihka pemutus peresa ti nyulut dalam tetiap peresa,” ku iya nengah siti penerang media ditu, kemari.
Ku Andy madah, haribulan kepenudi nganjung salin pemutus peresa anak kaban gerempung tu ngagai NSJA iya nya kena 7 Mei ti deka datai.
Salin pemutus tu ulih dianjung ngagai Mandal Presiden Rosemaria Buma enggau betelefon ngagai lumur 016-8718793 tauka Sekretari Michelle Choo ba lumur 016-8919280 maya tauka sebedau haribulan kepenudi nya.
Dulu ari nya, Menteri Muda Dagang Temuai, Seni enggau Main Asal Datuk Sebastian Ting nyuaka pemeri ngagai NSJA ti nyadika kelai sukung iya kena neruska pengawa meri insentif ngagai anak kaban NSJA.