KUCHING: Bisi dua agi kluster baru COVID-19 ba nengeri tu iya nya Kluster Jalan Bangunan Kerajaan, Beluru enggau Kluster Sungai Kawi, Meradong.
Sekretariat Komiti Mutarka Penusah Ngenyit Nengeri Sarawak (JPBNS) madahka, nya ngujungka penyampau semua kluster COVID-19 ke agi aktif naka kemari bisi 42 kluster.
“Opis Pengerai Nengeri Sarawak (JKNS) udah netapka dua agi kluster baru iya nya Kluster Jalan Bangunan Kerajaam, Beluru enggau Kluster Sungai Kawi, Meradong,” ku JPBNS nengah penerang berita, kemari.
Bekaul enggau kluster ke agi aktif, ari penyampau 42 kluster ke agi aktif bisi 13 kluster nambah kes enggau 29 kluster nadai nambah kes.
Bepelasarka statistik dua kluster baru kemari iya nya Kluster Sungai Kawi, Meradong bisi 119 kes enggau Kluster Jalan Bangunan Kerajaan, Beluru bisi enam kes.
Kelimpah ari nya kluster bukai ke bisi nambah kes baru kemari nyengkaum Kluster Bulatan Aman, Sibu bisi nambah lapan kes; Kluster Jalan Maju, Sibu (lima kes); Kluster Jalan Kampung Hilir (siti kes); Kluster Kampung Binyu, Kuching (11 kes); Kluster Tembok Sri Aman (tiga kes); Kluster Batu Gong, Serian (dua kes); Kluster Taman Vistagro (dua kes) enggau Kluster Jalan Muhibbah, Betong nambah tiga kes.
Kelimpah ari nya JPBNS ngeripotka Pelilih Menua Dalat enggau Daro kemari ba status Kuning.
“Sehari tu (Kemari) Pelilih Menua Dalat enggau Daro udah betukar ari status Gadung ngagai Kuning pengudah ngerikodka siti (Dalat) enggau empat kes (Daro) berampit ba pelilih menua tu,” ku JPBNS.
Tu ngujungka penyampau semua pelilih menua ba status Gadung nurun ngagai lima pelilih menua enggau pelilih menua ba status Kuning nambah nyadi 19 pelilih menua.
Lalu 12 pelilih menua agi ba status Mirah enggau empat pelilih menua ba status Oren.