SIBU: Operasyen ngempang jalai alun (SJR) ti dipejalaika ba roundabout Pradom, Sibu berindik ari Atur Nagang Pemindah Bisi Penetap (PKPB), endang pengawa ti semampai dipejalaika raban penyaga pengelikun.
Kepala Polis Pelilih Sibu ACP Stanley Johnathan Ringgit ngenang pasal gambar kerita ti berintai panjai ba palan nya ti diripotka dikerembaika ba media sosial kemari.
Ku iya, SJR di pelilih nya endang seruran dikemaru enggau diteritka kena nentuka rayat ngasika PKPB ti dipejalaika kena ngemutuska rentayan pengelekai penyakit COVID-19.
“Nadai utai ti nyelai ba kerita ti berintai panjai. Engka laban sehari tu Hari Satu,” ku iya kemari.
Dulu ari nya, ba gambar nya, kerita dipeda berintai panjai nengah SJR ti dipejalaika Polis Diraja Malaysia (PDRM) Sibu, dibantu Raban Soldadu Malaysia (ATM).
Raban pengereja pengawa terabai menua nya madahka terit agi nyaga enggau meresa semua kerita ti tama ke puak pasar.
Kena 26 Mac tu tadi, Komiti Mutarka Penusah Ngenyit Nengeri (JPBN) Sarawak ngambi pemutus ngelanjarka PKPB nyentuk pukul 11.59 malam 12 April.
Pemutus ngelanjarka PKPBti patut semina naka 29 Mac, digaga laban kes positif di Sarawak mengkang mayuh.