BINTULU: Pengermeran industri ba bagi menua tu kelebih agi dalam sektor minya enggau gis dilalau ngambi ngetuka enda lama pengawa ngambi pengereja pengawa ari Zon Mirah dalam nagang pengelekai pandemik COVID-19.
Kaban Parlimen (MP) Bintulu Datuk Seri Tiong King Sing dalam penerang iya kemari madahka diri irau ati ngagai penyampau kes positif COVID-19 ti ngaul pekereja kunterik dalam kededua sektor ti bekaul ke datai ari Zon Mirah.
Ku iya nambah, taja pan ditemu bisi pengemeran industri tauka ejen ti ngasuh pengereja pengawa kunterik sida ngelalaika penerang nya, tang raban sida bisi penerang ti tegap bekaul penyalah ke digaga sekeda raban ti bekaul.
Sebedau tu, nitih ku Tiong, iya empu udah berapa kali minta kompeni ti bekaul bejalaika tanggungpengawa rama sida ngambika sama ulih ngelaban igi penyakit tu nyengkaum meri penerang ke betul enggau lurus ngagai Opis Menteri Pengerai Malaysia (KKM).
“Raban tu enda patut nyaruka penemu sereta ngelalaika status pengereja pengawa sida laban pengawa nya ulih ngenusahka pengawa nagang pengelekai igi penyakit tu,” ku iya.
Tiong ti mega Duta Khas Menteri Besai ke Republik Rakyat China sama ngansak kompeni ti enda meri kerejasama nadai ulih lari ari kena tinggang ukum undang-undang nyema agi ngerejaka pengawa bansa tu.
“Berindik ari tu, aku minta bala operator ba tetiap kompeni ngambika merati sereta bejalaika pengawa matau ti terit ninting maya ngambika tetiap pengereja pengawa sida ngasika Prosedur Operasyen Standard (SOP) ti ditetapka,” ku iya nyemetak.