KUCHING: Timpuh Atur Nagang Pemindah Bisi Penetap (PKPB) ba Sarawak dilanjarka ngagai 14 hari agi, nyentuk 15 Mac 2021.
Sekretariat Komiti Mutarka Penusah Ngenyit Nengeri Sarawak (JPBNS) madahka, pekara nya ditetap bepelasarka gaya kes COVID-19 ba nengeri tu ke majak nambah.
“Pengudah meda enggau beratika gaya kes positif ba Sarawak ke majak nambah, JPBNS udah ngemutuska deka ngelanjarka Atur Nagang Pemindah Bisi Penetap (PKPB) ba Sarawak, berengkah 1 Mac 2021 pukul 12.01 pagi ngagai 15 Mac 2021 pukul 11.59 malam (14 hari),” ku JPBNS nengah penerang berita kemari.
Nambahka nya Atur Nagang Pemindah Diteritka (PKPD) dipejalaika ba Skim Penempatan Semuala Sentosa, Fasa 2, Sibu, ku JPBNS.
Ku JPBNS, nya berindik ari udah beratika risiko pengudah kes positif ba kandang endur nya.
“JPBNS udah berati tauka mansik risiko pengudah kes positif ti bekaul enggau kandang endur Sentosa ba Pelilih Menua Sibu.
“Nya alai, JPBN udah ngemutuska deka bejalaika PKPD ba Sentosa, Sibu berengkah 27 Februari (12.01 pagi) ngagai 12 Mac 2021 (pukul 11.59 malam),” ku JPBNS.
Kelimpah ari nya dalam penerang berita ke sama, JPBNS ngeripotka Pelilih Menua Asajaya udah ba status Kuning enggau Pelilih Menua Bau ba status Oren kemari.
Lalu pelilih menua ke bukai agi ba ststus ti sama baka ke diripotka ensanus.
“Sehari tu (kemari), Pelilih Menua Asajaya udah betukar status ngagai Kuning pengudah siti (1) kes berampit baru ba pelilih menua tu bisi ditemu.
“Pelilih Menua Bau udah betukar ngagai status Oren pengudah ngerikodka sebepenyampau 22 kes berampit ba pelilih menua tu dalam timpuh 14 hari ke udah,” ku JPBNS.