SRI AMAN: Atur Nagang Pemindah Bisi Penetap(PKPB)ukai patut nyadi kebuah enda ngereja pengawa nentuka pemansang ba sitak ti diari nitihka pelin ti udah diperambu.
Bedau lama udah, Menteri Muda Pengelantang Komuniti Sarawak, Datuk Francis Harden Hollis ke mega Kaban Kunsil Nengeri Simanggang udah baum enggau Ketuai Opis ke dipilih baka Opis Parit enggau Entali Ai (JPS) Bagi Menua Sri Aman enggau Opis Kereja Raya (JKR) Bagi Sri Aman, pagi kemari.
Ku iya, tuju aum nya laban deka mending kediri empu pelin enggau status projek ke ari baruh kuasa ejensi nya kelebih agi projek rayat dalam DUN Simanggang.
Lebuh ke ngabas Ketika Projek Tranformasyen Menua Pesisir (RTP) ti udah digaga, Harden meri terima kasih ngagai perintah nengeri Sarawak ti betuaika Kepala Menteri,Datuk Patinggi (Dr) Abang Abdul Rahman Zohari Tun Abang Openg.
Ku Harden, perintah ti diiring Kepala Menteri udah ngamatka semaya meri agih belanja ngagai pengari GPS dikena ngaga pemansang ba sitak sida.
“Pengawa dipeda bisi belinsur meri pemansang ngagai DUN Simanggang,” ku iya.
Sekeda ari projek RTPti udah tembu digaga iya ngangkatmanah Balai Mayuhguna Saint Peter Chapel, Batu Lintang, Undop, Sri Aman ngena belanja RM70,000 ti digaga Syarikat Nizam Bersaudara.
“Projek tu dikearap ulih mantupka ati ba peminta Komuniti Chapel Saint Peter ti nyadi palan ngaga aktiviti ngemansangka mensia ti ngembuan ulah ke manah,” ku Harden.
Siti agi projek rayat ti bisi diabas iya, iya nya Balai Mayuhguna Rumah Encharang, Kampung Klassen Sekula ke beungkus RM50,000 ti digaga Syarikat Bina Mansang.
Ku Harden, peminta Komiti Pemansang enggau Pengelikun Genturung Pendiau (JKKK) Rumah Encharang, Klassen Sekula nyadi nyata pengudah Balai Mayuhguna nya udah tembu digaga lalu perengkaguna nya patut dikena sereta dijaga enggau manah ngambika semampai relevan.
Lebuh beratika sukut pemansang dalam DUN Simanggang,endang udah dipeda maju enti dibandingka enggau 57 taun ke sebedau tu, ku Harden.
“Rayat tau enda ibuh agi bedarat ngagai Pasar Simanggang. Bungkur jalai alun udah digaga lalu semina peranak dia patut ngea perengkaguna nya dikena ngulihka penataika pemisi dikena ngangkatka tikas pengidup sida,” ku iya.
Sama bisi enggau ngabas projek RTP nya, Penghulu Mingging Sigan, Ketuau Raban Bansa Iban, Kandang menua Undop, Sapit Tuai Opis Kaunsil Pelilih Sri Aman (MDSA), Kunsilor Andar Suntai, Kunsilor Denneil Saweng enggau JKKK Sungai Antu, Batu Lintang, Undop, Sri Aman, Belilie Ajah.