SARIKEI: Penguna di Bagi Menua Sarikei semina dikemendarka melia tiga paket minyak sumai ti bisi subsidi 1 kg ungkup tetiap sekali meli.
Ketuai Pampang Opis Menteri Dagang Dalam Menua enggau Pekara Penguna (KPDNHEP) Pampang Sarikei Mohamad Zawawi madah, jaku tangkan tu dikeluarka ngagai perenchit enggau pengempu palan bebelika barang kena ngenyukpka bekal minyak sumai paket 1kg kelebih agi maya betapia enggau gaya pandemik COVID-19.
“Raban KPDNHEP ngarapka atur ti ditetapka tu ulih nentuka mayuh penguna bisi peluang bulih bekal minyak sumai ti diberi subsidi ari perintah.
“Penguna mega ditangkan ngambika enda bebelika barang ngenyit laban bekal pemakai ninting hari agi chukup,” ku iya madah ngagai media, kemari.
Dulu ari nya, bisi 37 premis pemurung enggau perenchit ditu diperesa kena nentuka bekal pemakai chukup lalu bala pedagang nitihka undang-undang sereta enda nikika rega barang.
Berindik ari nya, ku iya, raban penerit adat enggau Pemesai Matau Rega Barang KPDNHEP Sarikei terus chakah matau ninting hari kena nentuka bekal pemakai muntang diulih.
“Sebarang ripot bekaul enggau bekal pemakai sereta rega barang enggau bisi pengawa penguna ti bebelika barang ngenyit ulih dipadahka ngagai Bilik Operasyen KPDNHEP Sarikei enggau betelefon ba lumur 084-657751,” ku Mohamad nandu.