KUCHING: Perintah Sarawak deka nyaup bala nembiak di nengeri tu mayar pulai duit injau laluh ti bedau dibayar ari Perbadanan Tabung Pendidikan Tinggi Nasional (PTPTN) ti nyadi pemeri insentif baka ti udah disemaya sebedau tu.
Kepala Menteri Datuk Patinggi Abang Johari Tun Openg madah, perintah Sarawak ari baruh Gabungan Parti Sarawak (GPS) udah ngungkupka RM30 juta ke tuju nya.
Ku iya, Perintah Sarawak nengah Yayasan Sarawak udah berandau enggau PTPTN kena nentuka chara mayar pulai laluh duit injau nya ngagai PTPTN.
“Diatu baru aja tembu baum entara Yayasan Sarawak enggau PTPTN, udah bisi formula kena kami mantu bala nembiak Sarawak mutarka laluh duit injau nya enggau PTPTN, lalu kami udah nyendiaka ungkup belanja sepenyampau RM30 juta”, ku iya.
Iya madah munyi nya ba aum media pengudah pengerami nyerahka dua buah bas pemeri ari perintah Sarawak ngagai Politeknik Mukah enggau Politeknik Metro Betong ba laman Wisma Bapa Malaysia, Petra Jaya ditu kemari.
Pemeri insentif nya deka nyaup bala nembiak nembuka 30 peratus ari laluh utang sida ba PTPTN, ti mungkur 9,634 iku nembiak.
Ngenang pasal bantu bukai ke diberi ngagai bala nembiak Sarawak ku iya, Perintah Sarawak udah mantu bala nembiak Sarawak ari sukut ungkus tambang balik ke nengeri tu maya musim pengerami ungkup bala nembiak Sarawak ti belajar di Semenanjung Malaysia.
Ku iya baru, perintah mega Sarawak udah ngambi inisiatif nyendiaka servis bas sekula enda bebayar ngagai bala nembiak, kelebih agi di bandaraya Kuching kena ngelempungka tating belanja apai indai.
“Servis tu atur Yayasan Sarawak lalu deka dikerembaika ngagai mengeri bukai di Sarawak jemah ila,” ku iya.
Sentang Pelajar pra-sekula, iya madahka Tadika Sedidik ke sebedau tu ari baruh pegai SEDC udah diambi lalu ari baruh pegai Perintah Sarawak nengah Opis Menteri Pengelantang Pendiau Komuniti, Orang Indu, Ruang Bilik enggau Pemansang Nembiak Mit kena nentuka pelajar pra-sekula di Sarawak ngembuan struktur ke teatur agi.
Ku iya, Perintah Sarawak udah mansutka belanja nyauka RM600,000 kena meli dua buah bas nya ke ulih ngundan 25 penumpang, ke dikena bala nembiak bejalaika aktiviti di kedua-dua politeknik nya.
Tu berindik ari peminta bala nembiak ti dikenataika maya sesi Town Hall ‘Berambeh ngan Abang Jo’ beserimbai enggau Karnival Today for Tomorrow (T4T) kena 6 Julai 2019 di Mukah enggau 15 Disember 2019 di Betong, ke alai Datuk Patinggi Haji Abdul Rahman Zohari udah setuju meri dua buah bas ngambika bisi dikena ba kedua-dua politeknik nya.
Sama bisi ba pengerami nya, Sapit Kepala Menteri Datuk Amar Douglas Uggah Embas, Menteri Pengelantang Pendiau Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah, Sekretari Perintah Nengeri Datuk Amar Jaul Samion, Menteri Muda Undang-Undang, Kaul Nengeri enggau Perintah Besai sereta Matau Projek, Datuk Sharifah Hasidah Sayeed Aman Ghazali enggau bala temuai ke bukai.