BETONG: Orang bumai bekebun diperansang bejalaika aktiviti ti senang, meri asil enggau penatai pemisi dalam timpuh ti pandak.
Kaban Kunsil Nengeri (ADUN) Layar Gerald Rentap Jabu madahka, nya ulih nambahka agi asil enggau penatai pemisi kelimpah asil ari aktiviti besai.
Iya meri penemu entara aktiviti ke senang sereta endang selalu bisi peminta baka begaga lalu nyual pemakai asal bansa kitai Iban.
“Kemeran tauka kereja aktiviti ti senang sereta jampat meri asil. Ari tu kita deka ulih nambahka asil enggau penatai pemisi dalam timpuh ke pemadu pandak.
“Chunto ti pemadu manah, ngaga sereta nyual kasam ikan ti diasil tauka digaga orang rumah panjai,” ku iya seraya madah produk nya seruran bisi peminta.
Rentap mansutka pekara nya sebedau iya ngulu licha bejalaika projek Agriculture Facilitation Fund (AFF) ba Opis Betanam Betupi Bagi Menua ditu, ensanus.
Tang ku Rentap, dikena nentuka produk nya seruran bisi kena nangkup peminta, rentayan bekal mesti tegap.
Nambahka nya ku iya, ngagai barang sapa ti bisi ati tauka pengerindu deka bejalaika aktiviti baka nya tau minta bantu duit enggau input ari Opis Betanam Betupi.
“Opis tu nyendiaka tangki plastik, pum ai enggau anak ikan ari baruh inland fish breeding scheme.
“Tang mesti bisi semangat enggau komitmen. Kitai enggai orang ti enda bebendar, laban nya ulih ngayahka belanja,” ku iya.
Nyerumba program mendika licha bekaul enggau AFF, Rentap bisi nyuaka geran RM10,000 ngagai Kelab Rekreasyen Opis Betanam Betupi Betong.
Sama bisi datai, Sekretari Politik ngagai Kepala Menteri Dr Richard Rapu ngarika Menteri Betanam Betupi Moden, Tanah Adat enggau Pemansang Kandang Menua ti mega Kaban Kunsil Nengeri Layar Datuk Amar Douglas Uggah Embas sereta pemesai opis betanam betupi bagi menua Petrus Kang enggau pemesai ke bukai.