KUCHING: Bisi siti kes baru positif COVID-19 dirikodka di Sarawak, ti diripotka ba Pelilih Menua Kuching, kemari.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, nya nyadika penyampau semua kes positif COVID-19 di Sarawak nambah nyadi 1,042 kes.
Nitihku JPBNS nya, siti kes baru nya udah diperesa laban bisi kelai rampit saluran pernafasan, ti udah diperubat ba Sepital Besai Sarawak (HUS) kena 16 November 2020 laban ti bisi tabin, batuk, pedis rekung enggau pedis pala kenyau ari 12 November 2020.
“Kes dipasukka ba wad pengasingan HUS nyadi Severe Acute Respiratory Infection (SARI). Kes diperesa COVID-19 kena 16 November 2020 sereta ditemu positif ba hari ke sama.
“Nengah pansik silik ke dipejalaika, kes bisi kontak semak enggau kes ke-1,040, iya nya bakih sama enggau kereja.
“Kes tu benung dipansik sereta pengawa nyidi kontak kes tu benung chakah dipejalaika. Kes iya nya kes berampit dalam kandang menua tu,” ku JPBNS madah kes nadi ke luar menua senggau ngagai kandang endur risiko COVID-19.
Nambahka nya, ku JPBNS, naka kemai agi bisi lima kluster ke agi aktif iya nya Kluster Jalan Abell, Kuching; Kluster baki, Kuching; Kluster Seladah, Kuching; Kluster Greenhill, Kuching enggau kluster Wisma Saberkas, Kuching.
Kemari bisi dua kes gerai baru sereta dikemendarka pansut ari HUS, tu nyadika penyampau semua kes ke udah gerai nambah nyadi 933 iku tauka 89.54 peratus ari penyampau semua kes COVID-19 ba Sarawak.
Kemari nadai kes diperubat ba Unit Siru Intu (ICU) lalu bisi siti kes benung nerima bantu kereban enseput ba wad kediri HUS.
Bisi 12 PUI baru udah diripotka sereta bisi siti PUI agi nganti pemutus peresa makmal.
Kelimpah ari nya kemari bisi 409 Person Under Surveillance (PUS) udah ngerejista ba hotel sereta dikuarantin, ti nyadika penyampau semua PUS ba 30 buah hotel enggau SC ukai hotel bisi 3,104 iku.