KUCHING: Bisi 15,893 meter padu (m³) kayu batang udah dirampas enggau penyampau rega royalti urung RM1.03 juta.
Sapit Kepala Menteri, Datuk Amar Awang Tengah Ali Hasan madahka, taun tu naka 15 Oktober 2020 bisi 64 keretas pansik dibuka ti nyengkaum dua kes udah dikompaun, siti kes ditutup, siti kes agi dalam proses pechara enggau ke bukai dalam proses beratika nya ba mayuh renggat.
“Sepenyampau 15,893 meter padu kayu balak udah dirampas enggau rega royalti urung RM1.03 juta.
“Ti dirampas mega nyengkaum 50 perengkaguna enggau injin baka lori, jengkaut enggau jentolak.
“Dalam taun tu mega, bisi lapan (8) kes ke dulu ari tu mega dipechara enggau dua kes ari nya udah ditukuka salah enggau diberi penalti lalu enam kes agi dalam proses pechara,” ku iya.
Awang Tengah ti mega Menteri Pemansang Mengeri enggau Pengeraja Asal Kedua mansutka pekara nya lebuh ti nyimpul jurai Opis Menteri nya ba hari kelima Aum Kedua Penggal Kelima DUN Sarawak Ke-18 ti diatur ba Kompleks DUN ditu, kemari.
Ku iya, perintah nengeri deka komited nagang pengawa nebang kayu enda beradat nengah mayuh chara udah dipejalaika nyengkaum nambah tauka ngangkatka pengulih ngena teknologi pemadu baru.
Kena 4 November 2020, Sarawak Aerial Detection Unit (SADU) ari baruh Opis Kampung Sarawak ti nyadi ketuai ngena pemisi guna teknologi hiperspektral di Malaysia dikena matau kampung seraya nyidi pengawa nebang kayu enda beradat di serata nengeri Sarawak.
Kelimpah ari nya, Awang Tengah lebuh ti ngenang pekara bekaul enggau industri kayu madahka, penatai pemisi ari eksport produk kayu Sarawak ari bulan Januari ngagai September 2020 tekeruga ketegal pandemik COVID-19.
Iya madahka peminta dagang besai Sarawak baka Jepun, India, menua Timur Tengah, Korea enggau ke bukai udah ngayanka bisi kurang peminta.
“Penyampau rega eksport produk kayu Sarawak udah kurang sepenyampau 20 peratus ngagai RM2.8 bilion dalam timpuh Januari ngagai September 2020 dibandingka enggau RM3.5 bilion dalam timpuh ke sama.
“Dalam timpuh ke sama mega, rega eksport produk kayu besai iya nya papan lapis nurun sepenyampau 17 peratus ngagai RM1.5 bilion dibandingka enggau RM1.8 dalam taun 2019.
“Lalu rega eksport produk kayu ke dagang pemadu besai iya nya Jepun mega nurun sepenyampau 17 peratus ngagai RM1.4 bilion dibandingka RM1.7 bilion dalam taun 2019,” ku iya ti mega Menteri Dagang Antarabansa enggau Industri, Terminal Industri enggau Pemansang Orang Dagang lebuh ke nyimpul jurai opis menteri nya.
Nambahka nya iya madahka kena mantu industri kayu betapi enggau pandemik COVID-19, perintah udah ngemendarka industri kayu proses keterubah ngambika beoperasyen maya Atur Nagang Pemindah dipejalaika.
Tu kena ngenukuka industri ulih napi peminta ke udah bisi sereta neruska aktiviti ekonomi ti pemadu diguna dalam timpuh nya, ku iya.
“Kena ngenegapka industri kayu enggau asil spun penatai kampung Sarawak, perintah nengeri mekuh ngagai pemansang industri produk ti ulih ngangkatka rega produk lebih agi perabot enggau produk ‘enginereed wood’.
“Tuju strategi pemansang tu kena meransang enggau nambahka penguna barang mata ari kebun bedandang besai kampung.
“Dalam timpuh ke sama, perintah nengeri mega chakah ngelakuka pengawa nanam buluh kena ngemansangka industri bepelasarka buluh,” ku iya ti mega Kaban Kunsil Nengeri Bukit Sari.