KUCHING: Penemu bejalaika dagang nengah chara digital ke nyadi siti platform, enggau chara baru patut chakah dikerembaika ngagai orang dagang raban biak di mengeri enggau menua pesisir.
Menteri Muda Dagang Antarabansa enggau Industri, Terminal Industri enggau Pemansang Orang Dagang, Datuk Mohd Naroden Majais madah, mayuh inisiatif perintah kena meransang raban biak ngambika bejalaika pegawa dagang nengah chara digital.
“Entara inisiatif ti dipejalaika (perintah nengeri) nengah opis menteri aku ungkup raban biak baka Kus Dropshipping Shopee, Digital Kenyalang Achievers, Woksyop Orang Dagang YouTubers enggau Kus Tiktok enggau Instagram Perniagaan.
“Naka ke diatu, opis menteri aku udah ngatur 23 program e-Dagang di serata Sarawak ti meri penguntung ngagai 621 iku orang biak nyengkaum ari Bagi Menua Serian.
“Nambahka nya, opis menteri aku nyendiaka geran nengah program e-Commerce Grant ke nyentuk sepenyampau RM5,000 kena orang dagang ngelaku enggau nyual produk sida ngena platform e-commerce baka Shopee, Lazada, Alibaba, Helpy enggau e-payment baka SarawakPay, Boost, Grab Pay. Touch’n’go enggau ke bukai. Geran tu diberi nengah chara dibayar pulai baru,” ku iya.
Iya mansutka pekara nya lebuh ti nyaut tanya ari Martin Ben (GPS-Kedup), ti nanyaka nama inisiatif ti dipejalaika perintah kena meransang raban biak ngambi bejalaika pengawa dagang nengah chara digital, maya sesi tanya saut aum hari kedua, Aum Kedua Penggal Kelima DUN Sarawak Ke-18 ti diatur ba Kompleks DUN ditu, kemari.
Nitih ku Naroden, kelimpah ari Opis Menteri Dagang Antarabansa enggau Industri, Terminal Industri enggau Pemansang Orang Dagang, ejensi bukai mega bisi bejalaika program digital.
Program digital ti diatur ejensi bukai baka Digital Entrepreneurship Programs dipejalaika Sarawak Digital Economy Corporation (SDEC), Bumiputera Entrepreneur Enhancement Program (SME Corp), Agro Bazaar Online (FAMA), Program #Mymudah dan Pendigitalan Perniagaan (PMC) enggau SME DIgitalisation Matching Grant (SME Bank).
Bejaku baru, iya madahka perintah nengeri nyendiaka mayuh bengkah perengkaguna baka numbuhka Digital Innovation Hub enggau Digital Community Centre kena meri peransang sereta nambahka pengerindu raban biak bejalaika pengawa dagang nengah chara online.
“Ari baruh program ti dipejalaika SDEC bisi dua buah Digital Innovation Hub di serata nengeri tu ti nyendiaka perengkaguna tauka kereban internet ti deras, palan alai berandau enggau ke bukai, sereta eksesais enggau sistem sukung ungkup raban biak ti bisi pengerindu.
“Digital Community Centre dipejalaika opis menteri kami begulai enggau Opis Menteri Kaunsil Kandang Menua enggau Pengawa Berumah sereta Pustaka Negeri Sarawak, kena nyambungka digital hub ti tebal agi ba mengeri besai ngagai komuniti menua pesisir.
“Servis ti disediaka nyauka sama, semina ulih nangkup peminta guna 25 iku dalam siti timpuh,” ku iya lebuh ti nyaut tanya tambah ari Martin.
Lebuh ditanya chara mantu ngelakuka produk orang dagang Sarawak ke menua luar, ku Naroden, opis menteri iya begulai enggau ejensi bukai numbuhka Sarawak Pavillion Kuala Lumpur enggau STATOS.
Ku iya, Sarawak Pavillion enggau STATOS nya alai mandang sereta ngelakuka produk ke dijual Sarawak enggau produk dagang temuai ti lebih besai di Kuala Lumpur enggau Singapura.
“Perintah kitai mega deka numbuhka palan ti sama ba menua bukai baka di Brunei, Indonesia enggau ke bukai,” ku iya.
Kelimpah ari nya maya Atur Nagang Pemindah (PKP) dipejalaika berengkah ari bulan Mac taun tu, ku Naroden, opis menteri iya bejalaika platform online iya nya ‘Bazaar Ramadan Online Sarawakku Sayang’ (BROSS).
Perintah numbuhka BROSS kena mantu orang dagang mit nyengkaum orang dagang biak nyual produk nengah media sosial, lalu dalam timpuh ti sama nyendiaka servis nganjung ari vendor ke rumah orang ke meli produk.
BROSS ditumbuhka berindik ari pasar tauka bazaar Ramadan enda dikemendarka dalam timpuh PKP kena nagang pengelekai pandemik COVID-19.
“Dalam timpuh nya, enda kurang ari 7,500 pedaja mit di serata nengeri berejista enggau BROSS sereta ngena chara online nya (BROSS), lalu penyampau asil semua sida urung sepenyampau RM35 juta.
“Ba penemu aku,sambut raban biak ba pengawa dagang digital tu chukup manah.
“Nya alai aku minta semua YB ngelakuka penemu dagang nengah chara digital ngagai raban biak, sekalika di mengeri tauka di menua pesisir, laban tu chara ti pemadu engkeman enggau chara baru bedagang jemah ila,” ku iya.