PAKAN: Peranak kandang menua pesisir kelebih agi rumah panjai diatu mesti lebih tebuka runding ba pengawa betanam betupi moden ngambika ulih nyungkak asil dagang sida ngagai menua luar.
Kaban Kunsil Nengeri (ADUN) Pakan, Tan Sri William Mawan Ikom madah, endang enda ulih disangkal pengawa betanam betupi iya nya pemansut penatai pemisi bala pekebun kenyau ari dulu suba.
Tang ku iya, diatu peminta ba asil utai tanam bebida seriris enggau ubah kemaya hari tu.
“Kitai nemu betanam betupi udah dikemeran peranak kenyau ari dulu suba kelimpah nyadika pemansut penatai pemisi kitai kena meli perengka ke guna besesehari.
“Tang penemu dalam bidang betanam betupi ke bisi enda chukup enggau chara kitai ngemansangka pengawa nya mega bedau dalam tikas ulih ngemansutka asil ke tinggi.
“Tu laban pengawa betanam betupi diatu udah ngagai moden nengah teknologi sereta chara baru ti lebih manah ari sukut asil kitai,” ku iya bejaku maya bejadika ‘Program Jangkauan Komuniti Pertanian’ (AgriCOP) 2020 ke diatur Opis Betanam Betupi pelilih Pakan enggau PPK Julau/Pakan di Rumah Jantan, Tebok di Wak di Pakan, kena Hari Empat, empai lama.
Ku Mawan, diatu asil utai tanam di Sarawak udah didagang ke menua luar baka Singapura ti patut nangkup kriteria nya.
Berebak enggau nya ku iya, peranak rumah panjai tauka pekebun ke bekaul patut sedia dalam transformasyen pengawa betanam betupi enti enda sida deka tinggal di belakang.
“Kitai udah bisi modal, bisi tanah enggau asil betanam betupi ti deka dikemansangka kitai tang udah sedia ke enda kitai, baka ni kitai deka besemekih enggau orang bukai, ari sukut pengereja pengawa, kualiti kitai?
“Tu laban diatu peminta dagang dunya, nya ukai semina begunaka asil ti bekualiti tang mega timpuh ti engkeman alai asil nya dianjung,” ku iya nyemetak.
Ku Mawan, nya alai dikearap pengawa ngatur kus tu beserimbai AgriCOP mega beratka ngagai sukut spesifik baka rentayan dagang asil produk utai tanam.