SIBU: Menteri Muda Pelajar, Sains enggau Pansik Teknologi, Dr Annuar Rapa’ee enggaika pekara pelajar dichampur enggau politik.
Ku iya, semua main politik dalam pelajar endang enda ulih diterima.
“Kitai deka nentuka pelajar endang enda ulih dichampur taja kitai ngembuan idealogi politik ti enda sebaka,” ku iya nerang.
Dr Annuar madah munyi nya lebuh ti bejadi ‘Majlis Perkhidmatan Cemerlang Tahun 2019’ Renggat Opis Pelajar Pelilih (PPD) Sibu ti diatur ba sebuah hotel ditu, kemari.
Nitih ku iya, perintah nengeri numbuhka Opis Menteri Pelajar, Sains enggau Pansik Teknologi ba taun 2017 ukai nya tuju opis menteri tu deka ngambi tanggungpengawa Opis Menteri Pelajar ba renggat perintah besai.
“Kitai nemu guna opis menteri ditumbuhka ba Sarawak kena mantu nama ti kurang di nengeri tu. Kitai mega bebendar deka mutarka semua penanggul sereta pengurang ti bisi di Sarawak,” ku iya.
Menteri Muda Pengawa Berumah enggau Pengerai Mensia Mayuh nya nyemetak madahka komitmen perintah nengeri Sarawak dalam pelajar endang besai.
“Dua hari ke udah, Kepala Menteri Datuk Patinggi Abang Johari Tun Openg udah numbuhka unit khas Sekula Primari (SJK) China Sarawak.
“Unit khas tu betuaika Menteri Kaunsil Kandang Menua enggau Pengawa Berumah Dato Sri Dr Sim Kui Hian tu dikena nyemaka sereta ngatur bantu belanja ti diungkupka perintah nengeri ungkup sekula primari China di Sarawak,” ku iya.
Dr Annuar madah, ari 60,000 nembiak di SJK (C) tu, 20,000 nembiak nya ari raban bansa Bumiputera.
“Kitai sedar iya nya sekula China tu megai tanggungpengawa ti berat dalam pelajar di nengeri Sarawak, laban nya taja nama sekula China tang mega ungkup anak nengeri Sarawak.
“Kitai mega nemu kitai bisi tanggungpengawa ti berat dalam nentuka sekula tu bulih agih belanja ti chukup,” ku iya.
Dalam jaku pengelalu iya, Dr Annuar ke mega Kaban Kunsil Nengeri (ADUN) Nangka andal sereta muji semua servis enggau pengawa pengajar ungkup raban nembiak.
“Pengajar megai tanggungpengawa ti berat, ukai semina meri penemu, tang nyadi chunto ngagai nembiak.
“Lebuh siku nembiak besekula, ke pemadu beguna ukai nya chura kulit, nembiak nya Iban, China, Melayu tauka Orang Ulu tauka datai ari ruang bilik ke kaya tauka seranta, tang orang ke megai tanggungpengawa berat iya nya pengajar ti bediri ba mua kelas ngajar nembiak sekula,” ku iya nyemetak.
Sama bisi datai iya nya Pemesai Opis Pelajar Pelilih Sibu Ahli Chikba, Sapit PPD Sektor Ngatur Pelin Siti Mariam Abdul Rahman, Chairman Gerempung Prinsipal Sekula Sekondari Sarawak Sibu David Teo enggau Chairman Kaunsil Kepala Pengajar Abang Khadari Abang Bolhassan.
Bisi 372 iku penerima APG PPD Sibu taun 2019.