MIRI: Kunteriktor ti udah mujur bulih tinda ba projek Program Transformasyen Menua Pesisir (RTP) dipinta nembuka projek sida dalam timpuh ti udah ditetapka lalu asil projek sida mega mesti bisi kualiti.
Menteri Perengka Pengangkut Datuk Lee Kim Shin ngansak bala kunteriktor ngambika nitih spesifikasyen ti udah disediaka ejensi ke bekaul baka Opis Kereja Raya (JKR), Opis Kaunsil Mengeri Miri (MCC) sereta Opis Parit enggau Entali Ai (DID) lalu lebuh ti berengkah bejalaika projek laban tu pekara ti dikemerat iya nya nentuka semua projek ti udah tembu nya enggau kualiti ti manah sereta ulih tan ba timpuh ke panjai.
“Tuju agih belanja ungkup projek RTP tu dikemendar iya nya dikena meri pemaik ngagai mensia mayuh, berindik ari nya projek tu mesti tembu enggau integriti sereta nitihka langkar ke udah ditetapka,” ku Lee lebuh ti ngabas projek RTP ti udah tembu ba Kampung Lembah Hijau, Jalai Kampung Lopeng Tengah 2B enggau Kampung Pengkalan Lutong kemari.
Entara projek ba kedeuda genturung pendiau nya ti udah tembu iya nya pintu penama ngagai Kampung Lembah Hijau enggau ngangkatmanah balai komuniti; ngemanahka sistem parit ba Kampung Lopeng Tengah 2B; enggau mega projek ngaga palan rekreasyen enggau palan bemain nembiak mit ba Kampung Pengkalan Lutong.
“Pengawa aku meresa projek tu iya nya deka mansik sereta nentuka projek tu tembu nitihka spesifikasyen. Aku endang ngemeratka kualiti projek tu, lalu baka nya mega kunteriktor ti udah mujur bulih projek tu nengah prosedur bechabutka tinda. Semua pengawa tu dikena ngemanahka gaya pengidup peranak di genturung pendiau tu,” ku ku iya ke mega Kaban Kunsil Nengeri (ADUN) Senadin.
Sama bisi datai lebuh pengawa meresa nya ketuai komuniti renggat baruh tetiap genturung pendiau nya, injinir ari JKR enggau MCC sereta pengari kunteriktor ti bejalaika projek.