SIBU: Peranak Pasai Siong deka ngasaika pemaik ari Projek Ngemanahka Jalai Pasai Siong ti dipelabaka tembu ujung taun tu.
Nitih ku Kaban Kunsil Nengeri Tamin Ir Christopher Gira Sambang, tu siti ari projek rayat ti udah dibantaika Kepala Menteri Sarawak Datuk Patinggi Abang Johari lebuh iya nemuai ngagai Pasar Selangau, sebedau tu.
“Projek jalai sepenyauh 20 kilometer tu digaga ngena ungkus RM11 juta, nyengkaum kandang menua Pasai Siong Tengah, Pasai Siong Ulu enggau Pasai Siong Ili.
“Diatu udah tembu urung 63 peratus sereta benung digaga. Projek nya dipelabaka tembu ujung taun tu,” ku Gira dalam siti penerang ke dibantaika ba media rama ‘Facebook’ iya empu, kena minggu nyin tadi.
Pengudah projek tu tembu ila ku iya, jalai tu deka meri pemaik ngagai 30 buah rumah panjai, 2 buah sekula, tadika, enggau Klinik Pengerai ba kandang bagi menua tu.
Nangkanka nya, timpuh pejalai ari bagi menua Pasai Siong ke Mengeri Sibu deka nyadi pandak agi, iya nya semina setengah jam aja enti dibanding enggau sebedau tu sejam.
Projek tu mega nyengkaum projek ngemanahka jalai Batu ngagai jalai ke dibelakin iya nya 9.7 kilometer ba Pasai Siong Ili, 7.3 kilometer Pasai Siong Tengah enggau 3 kilometer ba Pasai Siong Ulu.
Kelimpah ari nya, Jalai tu deka ngemudahka agi raban ke diau ba kandang bagi menua nya, ke lebih agi ungkup sida ke ngembuan ladang sawit enggau raban pekebun moden, ngambika nyual asil betanam betupi nya ngagai Makit Sibu.
“Ngena peluang tu, aku ngarika DUN 59 Tamin deka meri terima kasih besai ngagai Perintah Sarawak, ke tebal agi Kepala Menteri Datuk Patinggi Abang Johari enggau YB Tan Sri James Jemut Masing laban udah ngemendarka projek jalai tu,” ku iya.