Anda di sini

COVID-19: Siti kes mati, siti kes positif baru dirikodka kemari

KUCHING: Sarawak ngerikodka siti kes mati ketegal COVID-19, ke lalu nyadika penyampau semua kes mati ba nengeri tu iya nya 19 kes. Kes mati kepenudi bisi dirikodka sebedau tu iya nya ke 11 Julai.

Beserimbai enggau nya, nitih ku Komiti Mutarka Penusah Ngenyit Nengeri Sarawak (JPBNS), siti agi kes baru positif mega bisi dirikodka kemari, lalu nyadika semua penyampau kes ti bisi ba Kuching diatu iya nya 38 kes lalu kes import bisi 14 kes.

Naka ke kemari, Kuching agi ba status Zon Kuning.

Kes mati ti nyadi tu iya nya ngaul siku indu ti beumur 63 taun ari Semariang Baru, Kuching lalu kes positif baru iya nya siku staf opis pengerai ari Kluster Sentosa.

Tu nyadika penyampau semua kes ari Kluster Sentosa iya nya 21 kes.

JPBNS nengah penerang kemari madahka Opis Menteri Pengerai deka ngenegapka agi pengawa Nyidi Kes Aktif (ACD) ba Kota Sentosa berindik ari kes ti majak nambah ba Kluster Sentosa.

Kes mati ke-19 tu iya nya kes ke-589 ti ditemu positif kena 17 Julai tu tadi.

Kluster bukai ti aktif di Sarawak naka kemari iya nya Kluster Syarikat Kejuruteraan (4), Kluster Mambong (5), Kluster Pusat Perubatan (3), Kluster Jupiter (3), Kluster Market Stutong (7), Kluster Jeti Kuching (2), Kluster PUI Melbourne (2) engau Kluster Syarikat Pembinaan (2).

Penyampau semua kes kumulatif ba Sarawak naka kemari iya nya 650 kes.

Berindik ari nya, naka kemari, 68 iku peranak Sarawak uda diperubat ba sepital ke alai 63 iku ba Sepital Besai Sarawak, empat ba Sepital Bintulu lalu siku ba Sepital Sungai Buloh, Selangor.

Beserimbai engau tu, dua kes ti udah gerai lalu dikemendarka pansut ari sepital kemari, ke nyadika penyampau semua kes ti udah gerai sereta dikemendarka pansut ari sepital iya nya 563 tauka 86.62 peratus.

Kuching, Bau enggau Samarahan agi ba status Zon Kuning lalu 37 pelilih menua ke bukai mengkang ba Zon Gadung.

JPBNS mega bisi ngeripotka enam kes orang agi dipansik (PUI) lalu lima agi nganti pemutus makmal.

39 kes baru orang agi dipatau (PUS) bisi dirikodka, ke lalu nyadika penyampau semua 605 udah dikuarantin ba 11 buah hotel di selampur nengeri tu.

Advertisement