Anda di sini

Penyampau temuai ke Sarawak nambah pengudah sektor dagang temuai beoperasyen baru

 Karim bejaku ba aum media di Kuil Sri Maha Mariamman ba Gunung Matang kemari. Sama bisi dipeda Hii (kiba) enggau Sebastian (kanan). — Gambar Roystein Emmor
AUM MEDIA: Karim bejaku ba aum media di Kuil Sri Maha Mariamman ba Gunung Matang kemari. Sama bisi dipeda Hii (kiba) enggau Sebastian (kanan). — Gambar Roystein Emmor

KUCHING: Penyampau temuai ke datai ngagai nengeri tu bisi nambah pengudah pengawa muka baru sektor dagang temuai dalam timpuh Atur Nagang Pemindah Mulaika Pemanah (PKPP).

Menteri Dagang Temuai, Seni enggau Main Asal Datuk Abdul Karim Rahman Hamzah madahka, statistik ngayanka penyampau temuai niki entara 50 ngagai 60 peratus dalam bulan Julai tu dibanding April, Mei enggau Jun.

“Taja penyampau temuai nyau bisi niki dalam bulan Julai tu tang dibanding dalam timpuh ke sama taun nyin kemari peratus nya nurun.

“Aku pechaya lebuh sektor penerebai bilun beoperasyen baru baka selama kena September, penyampau temuai deka majak nambah.

“Taja pia, kitai bedau deka meransang penatai temuai ari menua luar laban agi irauka pengelekai igi penyakit COVID-19,” ku iya.

Iya madah munyi nya maya aum media pengudah pengawa ngelancharka ‘Jejak Penemuan Beccari di Kuil Sri Maha Mariamman’ di Gunung Matang ditu kemari.

Sama bisi datai Menteri Muda Dagang Temuai, Seni enggau Main Asal Datuk Sebastian Ting sereta Sekretari Mendam Opis Menteri Hii Chang Kee.

Ba aum media nya, Abdul Karim mega madahka pengirau iya sentang kes COVID-19 niki ngenyit dalam timpuh beberapa minggu tu.

Balat ngirauka ati iya nya penyampau kes ke niki tu ngaul peranak kandang menua tu.

“Kami ngarap virus tu enda majak nambah laban enti majak niki nadai chara bukai kena mutuska rentayan nya semadi nengah pengawa ngempang jalai baka ke udah sebedau tu.

“Aku arap enda datai ba renggat nya enggau kami minta mensia mayuh ngambi seruran nitihka atur Prosedur Operasyen Standard (SOP) ti udah ditetapka,” ku iya.

Advertisement